ಕೊಲ್ಲದಿರು ನೆನಪೆ ಮುದ್ದು ಹೃದಯವನು
ಸುಡದಿರು ತಂಗಾಳಿಯೆ ಪ್ರೇಮಿಸಿದ ಮನವನು
ಮೋಹದ ಕಡಲೆ ನೋವಿನ ವಿಷವಾಗದಿರು
ಒಲುಮೆಯ ಹಾದಿಯೆ ಮುಳ್ಳು ಕಂಟಿಯಾಗದಿರು
ಕೊಲ್ಲದಿರು ನೆನಪೆ ಬೀಸುತ ನೋವಿನಲೆಯನು
ಪ್ರೀತಿಯೆ ಉಸಿರಾಗಿಸಿದ ಜೀವದ ಉಸಿರನು
ಅನುರಾಗವೆ ಬದುಕಾಗಿಸಿದ ಬಾಳನು
ಮುಗ್ದ ಮನದ ಸೌಜನ್ಯದ ಪರಿಯನು
ಕೊಲ್ಲದಿರು ನೆನಪೆ ಹೂ ಮೊಗ್ಗನು
ಮುಗುದೆಯ ಬಾಳನು ಮುಳುಗಿಸದಿರು
ನಗು ನಲಿದ ಮೊಗವ ಮಂಕಾಗಿಸದಿರು
ತುಂಟ ಮನದ ಕನಸಿಗೆ ಕಹಿಯುಣಿಸದಿರು
ಕೊಲ್ಲದಿರು ನೆನಪೆ ನಗುವ ನೈದಿಲೆಯನು
ಮೋಹದ ಬೆಳುದಿಂಗಳಲು ಕಣ್ಣಿಗೆ ಉರಿ ನೀಡದಿರು
ಸಚ್ಚರಿತ ಪ್ರೀತಿಯ ಪಯಣಕೆ ಕೊನೆ ಹಾಡದಿರು
ಪ್ರೇಮದ ಸದನದಲಿ ಒಲವ ನಿನದ ನಿಲ್ಲಿಸದಿರು
ಕೊಲ್ಲದಿರು ನೆನಪೆ ನಂಬಿದ ಬದುಕನು
ಸಾವಿರ ಆಸೆಗಳ ಮನಸನು ನೀ ದಹಿಸದಿರು
ಪ್ರೀತಿಯೆ ಮುಳ್ಳಾಗಿ ಕಣ್ಣಿಗೆ ಚುಚ್ಚದಿರು
ಪ್ರೇಮವೆ ನೋವಾಗಿ ತೀರದಿರಲಿ ಒಲುಮೆಯ ಬಾಳು
ರಾಮಚಂದ್ರ ಸಾಗರ್
ಸಹೋದರತೆ ಎಲ್ಲರೆದೆಯ ಹಾಡಾಗಲಿ
ಸಹಿಷ್ಣುತೆ ಇಂಧನ ಜಮಾವಣೆಯಾಗಲಿ
ಸೌಭಾಗ್ಯದ ಚೆಲುವ ಜಗವರಳಲಿ
ಎಲ್ಲರ ಮನ ವಿಹಿತವಾಗಲಿ
ವರ್ಣಗಳ ಬಂಧನ ವಿಮೋಚನೆಯಾಗಲಿ
ಧರ್ಮಗಳ ಕಂದರ ಕರಗಿಹೋಗಲಿ
ವೈಷಮ್ಯದ ಮನ ಹೂವಾಗಲಿ
ಜಗ ಸೌಭಾಗ್ಯದ ನಾಡಾಗಲಿ
ಸುಡುವ ಜ್ವಾಲೆಯು ಕೊನೆಗಾಣಲಿ
ಕಾಪಾಡುವ ಗುಣವು ಗಟ್ಟಿಗೊಳ್ಳಲಿ
ತ್ಯಾಗದ ಮನವು ಎಲ್ಲರದಾಗಲಿ
ನಿಸ್ವಾರ್ಥ ಜಗವು ಉದಯವಾಗಲಿ
ಜೊಳ್ಳಿನ ತತ್ವ ನಗ್ನವಾಗಲಿ
ಮಾನವ ಸತ್ವ ನೆಲೆಯಾಗಲಿ
ಸತ್ಯದ ಪಥವು ಎಲ್ಲರದಾಗಲಿ
ಜರ್ಜರಿತ ಸಮಾಜವು ಒಂದಾಗಲಿ
ಸ್ನೇಹ ಸತ್ಕಾರದ ಭಾವವರಳಲಿ
ಸುಗುಣಗಳ ಸಿಂಚನದ ಮನವಾಗಲಿ
ಅಬಲೆಯರ ರಕ್ಷಣೆ ಪಣವಾಗಲಿ
ಸಹೋದರಿಯರ ಏಳ್ಗೆ ಗುರಿಯಾಗಲಿ
ಅಧೈರ್ಯದ ನೋವು ಮರೆಯಾಗಲಿ
ಅನೈತಿಕ ಮಾತುಗಳು ದಹನವಾಗಲಿ
ನೋಡುವ ನೋಟವು ಸಚ್ಚರಿತವಾಗಲಿ
ಎಲ್ಲರೆದೆಯ ಹಾಡು ಸಹೋದರತೆಯಾಗಲಿ
ರಾಮಚಂದ್ರ ಸಾಗರ್
ಗೆಳತಿ..
ಚೆಲುವ ಬೊಂಬೆ ನೀ ಹೂವಂತೆ ನಗುತಿರಲು
ನನ್ನೆದೆಯ ಗೂಡಲಿ ಪ್ರೇಮದ ಹೂಮಳೆಯು
ನಗುವಿನಲೆಯ ನೀ ಸೂಸುತ ಸನಿಹವಾಗಿರಲು
ಹೃದಯ ಬಡಿತದಲಿ ನಿನದೇ ನಾಮವು
ಕುಣಿವ ನಿನ್ನ ಮುಂಗುರುಳ ಮೋಡಿಯೆ
ಪ್ರೀತಿಯ ಬಂಧಕೆ ನಿನ್ನೊಲವ ಕರೆಯು
ಕೋಮಲ ನಿನ್ನ ಮಧುರ ನುಡಿಯೆ
ಬಾಳ ನೌಕೆಗೆ ಸೌಜನ್ಯದ ಸಾರಥ್ಯವು
ರಂಜಿಸುವ ನಿನ್ನ ಒಲವಿನ ಜಗವೆ
ಭಾವಗಳ ನಾದಕೆ ನಿತ್ಯ ಕಾರಣವು
ಮೋಹದ ನಿನ್ನ ಕಣ್ಣೋಟದ ಕಲರವವೆ
ಅನುರಾಗದಲೆಯ ಸಿಂಗಾರದ ಸ್ವರಗಾನವು
ನಗುವಿನಲೆಯ ನಿನ್ನ ಅಕ್ಕರೆಯ ಬಂಧನವು
ಕಾವ್ಯದ ಶರಧಿಗೆ ಒಲವ ಬುನಾದಿಯು
ಕಾವ್ಯಲತೆಯು ನೀ ಜೊತೆಯಲಿ ನಗುತಿರಲು
ಪ್ರೇಮ ಸೌಧದಲಿ ಪ್ರೇಮಕಾವ್ಯದ ಸೌರಭವು
ಚೆಲುವೆ ನೀ ನುಡಿವ ಅಕ್ಕರೆ ಸಾಲುಗಳೆ
ಹೃದಯದ ಆರಾಧನಾ ಪದಮಾಲೆಯು
ನಗುವಿನಲೆಯು ಅರಳಿದ ನಿನ್ನ ಮೊಗವೆ
ಬಾಳ ಕದನಲಿ ಜಯಕೆ ಕಾರಣವು
ರಾಮಚಂದ್ರ ಸಾಗರ್
ಅನುರಾಗದಲೆಯ ನಿನ್ನ ಕಣ್ಣೋಟದಲಿ
ಅರಳಿದೆ ನನ್ನೆದೆಯಲಿ ಸಾವಿರ ಕನಸು
ಮೋಹದ ನಿನ್ನ ನಗುವಿನಲೆಯ ಮೊಗದಲಿ
ಜನನವಾಗಿ ಒಲವಿನ ಅನುಬಂಧವು
ಸವಿ ನುಡಿಯ ನಿನ್ನ ಮೋಡಿಯಲ್ಲಿ
ಪ್ರೀತಿಸುವ ಹೃದಯಕೊಂದು ಸಡಗರವು
ರಮ್ಯತೆಯ ಮೋಹದ ಸೊಬಗಲಿ
ಒಲವ ಹೂಲತೆಯ ಜನನವು
ರಂಗೇರಿಸುವ ನಿನ್ನ ಮೆಲು ಮಾತಿನಲಿ
ಪ್ರೇಮಿಸುವ ಜೀವಕೊಂದು ಹಿತವು
ನಿನ್ನೊಲುಮೆಯ ಬೆಳಕಿನ ಕದಿರಲಿ
ನಮ್ಮೊಲವ ಸೌಧದಲಿ ತಂಬೆಳಕು
ಸಿಹಿ ನೋಟದ ನಿನ್ನ ನಯನ ನುಡಿಯಲಿ
ಹೃದಯಕೆ ಅಭಯದ ಆಸರೆಯು
ಪಳಿಸುವ ಬೆಳುದಿಂಗಳು ಬೀದಿಯಲಿ
ಒಲವ ಮೆರವಣಿಗೆಗೆ ನಿನದೇ ಸಾರಥ್ಯವು
ಕಡಲ ಕಿನಾರೆಯ ಸೊಬಗಿನ ಹೊಳಪಲಿ
ಒಲವ ಬೊಂಬೆಯು ನೀನಾಗಿರಲು
ನಗುವ ನಯನದ ನಿನ್ನ ಶುಭವಾಣಿಯಲಿ
ಬಾಳಾಗಿದೆ ಸವಿಕನಸಿನಾ ಝೇಂಕಾರವು
ರಾಮಚಂದ್ರ ಸಾಗರ್
