ನೀನಿರದ ಕ್ಷಣದಲ್ಲಿ…

ನಿನ್ನ ಪ್ರೀತಿಯ ಸುಳಿಯಿಂದ

ನಾ ಹೇಗೆ ಹೊರ ಬರಲಿ ಗೆಳತಿ

ನಿನ್ನ ಮೋಹದ ಬಂಧನದಿಂದ

ನಾ ಹೇಗೆ ಹೊರಗುಳಿಯಲಿ 

ನಿನ್ನ ಪ್ರೇಮದ ಘಮಲಿನ ಅಲೆಯಿಂದ

ನಾ ಎಲ್ಲಿ ಬಚ್ಚಿಟ್ಟುಕೊಳ್ಳಲಿ

ನಿನ್ನ ಕಣ್ಣೋಟದ ಕಾಂತಿಯಿಂದ

ನಾ ಬೆರಗುಗೊಳ್ಳದೆ ಹೇಗಿರಲಿ

ನೀ ಬಾರದೆ ನನ್ನೆಡೆಗೆ ಒಲವೆ

ಪರಿತಪಿಸುವ ಮನದ ಪಾಡೇನು

ನೀ ಅಪ್ಪದೆ ನನ್ನೆದೆಗೆ ಉಸಿರೆ

ಎದೆಯ ದನಿಗೆ ಉಳಿವೇನು

ನೀ ಹೂಮನದಿ ಆಹ್ವಾನಿಸದೆ 

ಮನಕೆ ಕತ್ತಿಯಾಗಿ ಚುಚ್ಚುವೆಯೇನು

ನೀ ಬಯಕೆಯಲಿ ಬಳಿಯಾಗದೆ

ಕ್ಷಣ ಕ್ಷಣವು ನೋವಿನ ಮಳೆಯಾಗದಿರು..

ಬಾಳೆಲ್ಲ ನೀನಾಗಿರಲು ಉಳಿವೆಲ್ಲಿ

ಸಾಗಲಾರೆನು ವಿರಹದ ಹೊಳೆಯಲ್ಲಿ

ನೀನಿರದ ಹಾದಿಗೆ ಗೆಲುವೆಲ್ಲಿ

ಜೊತೆಯಾಗದೆ ಬಾಳಿಗೆ ನೆಲೆಯೆಲ್ಲಿ

ನಿನ್ನ ಪ್ರೇಮದ ಬಲೆಯೊಳಗೆ

ನಾ ಬಂಧಿಯಾಗಿರಲು

ನೀ ಒಲಿಯದೆ ಜಗದೊಳಗೆ

ನನ್ನುಸಿರು ದನಿಸುವುದೇನು...?

ರಚನೆ: ರಾಮಚಂದ್ರ ಸಾಗರ್