ಅನುರಾಗದಲೆಯ ನಿನ್ನ ಕಣ್ಣೋಟದಲಿ
ಅರಳಿದೆ ನನ್ನೆದೆಯಲಿ ಸಾವಿರ ಕನಸು
ಮೋಹದ ನಿನ್ನ ನಗುವಿನಲೆಯ ಮೊಗದಲಿ
ಜನನವಾಗಿ ಒಲವಿನ ಅನುಬಂಧವು
ಸವಿ ನುಡಿಯ ನಿನ್ನ ಮೋಡಿಯಲ್ಲಿ
ಪ್ರೀತಿಸುವ ಹೃದಯಕೊಂದು ಸಡಗರವು
ರಮ್ಯತೆಯ ಮೋಹದ ಸೊಬಗಲಿ
ಒಲವ ಹೂಲತೆಯ ಜನನವು
ರಂಗೇರಿಸುವ ನಿನ್ನ ಮೆಲು ಮಾತಿನಲಿ
ಪ್ರೇಮಿಸುವ ಜೀವಕೊಂದು ಹಿತವು
ನಿನ್ನೊಲುಮೆಯ ಬೆಳಕಿನ ಕದಿರಲಿ
ನಮ್ಮೊಲವ ಸೌಧದಲಿ ತಂಬೆಳಕು
ಸಿಹಿ ನೋಟದ ನಿನ್ನ ನಯನ ನುಡಿಯಲಿ
ಹೃದಯಕೆ ಅಭಯದ ಆಸರೆಯು
ಪಳಿಸುವ ಬೆಳುದಿಂಗಳು ಬೀದಿಯಲಿ
ಒಲವ ಮೆರವಣಿಗೆಗೆ ನಿನದೇ ಸಾರಥ್ಯವು
ಕಡಲ ಕಿನಾರೆಯ ಸೊಬಗಿನ ಹೊಳಪಲಿ
ಒಲವ ಬೊಂಬೆಯು ನೀನಾಗಿರಲು
ನಗುವ ನಯನದ ನಿನ್ನ ಶುಭವಾಣಿಯಲಿ
ಬಾಳಾಗಿದೆ ಸವಿಕನಸಿನಾ ಝೇಂಕಾರವು
ರಾಮಚಂದ್ರ ಸಾಗರ್
ಗೆಳತಿ..
ಬಿರಿದ ಮಲ್ಲಿಗೆಯ ಹೂ ಬನವು
ನಿನ್ನ ಕಿರುನಗುವ ಮೊಗವು
ಒಲವ ಕಾಂತಿಯ ಓರಣವು
ನಿನ್ನ ಮೋಹದ ಸಿಹಿನೋಟವು
ಎದೆಯ ಗೂಡಿನ ಪ್ರೇಮಗಾನವು
ನಿನ್ನೊಲವ ಸಹವಾಸದ ಫಲವು
ಜಗದ ಸೋಜಿಗದ ಪ್ರೇಮರೂಪವು
ಮನ ಬಂಧಿಸಿದ ನಿನ್ನ ಸಾರಥ್ಯವು
ಪ್ರೀತಿಯ ಹೊಳೆಯ ಜೀವದುಸಿರು
ನಿನ್ನ ಮೆಲುದನಿಯ ಹಾಡು
ಒಲವ ವಸಂತದ ಆಗಮನವು
ಹೃದಯವತಿ ನೀ ಬರುವ ಬಾಳು
ಒಲವ ತೋಟದ ಚೇತನವು
ನಿನ್ನ ಸೌಂದರ್ಯದ ಪ್ರೇರಣೆಯು
ಮೋಹದ ಕಡಲಿನ ಉಬ್ಬರವು
ನಿನ್ನ ಪ್ರೇಮಕಾಂತಿಯ ಕಾರಣವು
ಸದಾ ಬೀಸುವ ಒಲವಿನಲೆಯು
ನಿನ್ನ ಅವಿಶ್ರಾಂತ ನಗುವ ನಯನವು
ಸದಾ ನಲಿಸುವ ಘಳಿಗೆಯು
ನಿನ್ನ ಅಮಲೇರಿಸುವ ಕಿರುನಗೆಯು
ರಾಮಚಂದ್ರ ಸಾಗರ್
ಎದೆಯ ಗೂಡಲಿ ಮೊಳಗುವ ಗಾನವೆ
ನಿನ್ನೊಲುಮೆಯ ನಗುವಿನ ಫಲವು
ನೀ ನಡೆಸುವ ಹೂಬನದ ಹಾದಿಯೆ
ಪ್ರೀತಿಯ ಸೌರಭದಲೆಯ ಸ್ವಾದವು
ಪ್ರೀತಿ ಪದಗಳ ಸವಿ ಮೇಳವೆ
ನೀ ನಡೆಸುವ ಸಲ್ಲಾಪದ ಸಂಕಲನವು
ಪ್ರೇಮದ ಮಹಲಿನ ಬುನಾದಿಯೆ
ನೀ ನೀಡಿದ ಅಭಯದ ವಚನವು
ಅನುರಾಗದಲೆಯ ಇಂಪಾದ ಸೆಲೆಯೆ
ಮೆಲು ನಗುವ ನಿನ್ನ ಸೋಜಿಗದ ಮೊಗವು
ಹೃದಯದ ದನಿಯ ಬಡಿತವೆ
ನೀ ಹೃದಯ ಬೆಸೆದ ಬಂಧದ ಋಣವು
ಒಲವಿನ ವರ್ಷದ ಅಭಿಷೇಕವೆ
ನೀ ಜೊತೆಯಾದ ಸವಿ ಘಳಿಗೆಯು
ರಮಿಸುವ ಬಾಳಿನ ಹೂಮಾಲೆಯೆ
ನಗುತ ನಲಿಸುವ ನಿನ್ನೊಲವು
ಪ್ರೇಮದ ಕಡಲಿನ ದರ್ಶನವೆ
ನಿನ್ನ ಕಣ್ಣೋಟದ ಸವಿನೋಟವು
ಪ್ರೀತಿಯ ಮೆಲುಗಾಳಿಯ ಸುಳಿದಾಟವೆ
ನೀ ನಲಿವ ಸಡಗರದ ಬಾಳು
ಸದಾ ಗುನುಗುವ ಅನುರಾಗದ ಸ್ವರವು
ರಾಮಚಂದ್ರ ಸಾಗರ್
ಗೆಳೆಯಾ
ಬಾಳಿನ ಉಲ್ಲಾಸದ ಮಳೆಯೆ
ನೀ ನನ್ನವನೆಂಬ ಸವಿ ಕನಸು
ಹೃದಯದ ದನಿಯ ನಿನಾದವೆ
ನೀ ಬೆಸೆದ ಒಲವ ಬಂಧವು
ಜೀವದ ಒಲುಮೆಯ ಓರಣವೆ
ನೀ ನೀಡಿದ ಕೈಸೆರೆಯು
ರಂಗು ತುಂಬಿದ ಜಗವೆ
ನೀ ಮೋಹಿಸುವ ಕ್ಷಣವು
ಮನದ ಮನೆಯ ದೀಪವೆ
ನೀ ಕರುಣಿಸಿದ ಒಲವ ತಂಬೆಳಕು
ಒಲವ ನೌಕೆಯ ಇಂಧನವೆ
ನೀ ಜೊತೆ ನಗುವ ಸಾರಥ್ಯವು
ಪ್ರೇಮ ಪಯಣದ ಹಾದಿಯೆ
ನೀ ತೋರಿದ ಒಲುಮೆಯ ಪಥವು
ಮನಸು ಮೊರೆವ ಭಿಕ್ಷೆಯೆ
ನೀ ಆಗಮಿಸುವ ಘಳಿಗೆಯು
ಕನಸುಗಳ ಜಾತ್ರೆಯ ಮೆರವಣಿಗೆಯೆ
ನೀ ಸನಿಹವಾಗುವ ಸಂಬ್ರಮವು
ಇನಿದಾದ ಕನಸುಗಳ ಸಾಕಾರವೆ
ನೀ ನನ್ನೊಂದಿಗೆ ಒಪ್ಪಿ-ಅಪ್ಪಿದ ಬಾಳ್ವೆಯು
ರಾಮಚಂದ್ರ ಸಾಗರ್
