ಘನ ನಾಯಕ

ಸರ್ವರಿಗೂ ಕೀರ್ತನಾ ಸಾಹಿತ್ಯದ ಹರಿಕಾರ ಭಕ್ತ ಕನಕದಾಸರ ಜಯಂತ್ಯೋತ್ಸವದ ಶುಭಾಷಯಗಳು..

ಈ ಪುಣ್ಯ ಪುರುಷರ ನೆನೆಯುತ್ತಾ ನಾ ರಚಿಸಿದ ಕವಿತೆ ಘನ ನಾಯಕ..

ಘನ ನಾಯಕ

ಕೀರ್ತನಾ ಸಾಹಿತ್ಯದ ಹರಿಕಾರ

ಬಾಂಧವ್ಯ ಬೆಸೆದ ದಂಡನಾಯಕ

ದಹಿಸಲು ಕುಲ ಕುಲದ ವೈಷಮ್ಯ

ಸಮರ ಸಾರಿದ ಘನ ನಾಯಕ

ಭಕ್ತಿ ಪಂಥದ ಭವ್ಯ ಸಾರಥಿ

ದಾಸ ಪಂಥದ ದಿವ್ಯ ಕೀರುತಿ

ವ್ಯಾಸರಾಯರ ಹೃದಯದ ಒಡೆಯ

ಮಾಧ್ವ ತತ್ವಶಾಸ್ತ್ರ ಪಾರಾಂಗತ

ಭಕ್ತಿಯಲಿ ಹರಿಯ ತಿರುಗಿಸಿದ ದಾಸ

ಕಾಗಿನೆಲೆಯಾದಿ ಕೇಶವನಾರಾಧಕ

ಆರಾಧನೆಯ ಸಂಪನ್ನ ನಾಯಕ

ದಾಸ್ಯ ದಹಿಸಿದ ಹಠನಾಯಕ

ಮೋಹನ ತರಂಗಿಣಿ ಕಾವ್ಯದ ಜನಕ

ನಳಚರಿತ್ರೆ ಶೃಂಗಾರದ ಚಿತ್ರಕ

ರಾಮಧಾನ್ಯ ಚರಿತೆಯಲಿ ರಾಗಿಯ

ಯೋಗ ಬೋಧಿಸಿದ ದಾರ್ಶನಿಕ

ಕನ್ನಡ ಸಾಹಿತ್ಯ ಸಿರಿಯಾಗಿಸಿದ ನಾಯಕ

ಶಾಂತಿ ಪ್ರೀತಿ ಬೆಳಗಿದ ನಾಯಕ

ಬಾಡಾ ಗ್ರಾಮದ ನಮ್ಮ ತಿಮ್ಮಪ್ಪ ನಾಯಕ

ಸಾಮರಸ್ಯದ ಬದುಕು ಸಾರುತಾ

ದಾರಿದ್ರ್ಯ ದಹಿಸಿದರು ನಾಡಿನಗಲ

ಹೆಸರಾದರು ಕನಕದಾಸರೆಂದು

ಕುಲ ಕುಲಗಳ ಬೆಸೆದವರೆಂದು

ರಾಮಚಂದ್ರ ಸಾಗರ್  

ನೆನಪು..

ಕರಿಮುಗಿಲ ಬಾನಿನ ಮಳೆಧಾರೆಯ ಗರ್ಭದೊಳು

ಹನಿಗಳು ಭುವಿಯ ಮುತ್ತಿಕ್ಕುವಾಗ ಕಾಡುವುದು ನಿನ್ನದೇ ನೆನಪು

ಸಂಪಿಗೆ ಮೊಗ್ಗೆಯೊಡೆದು ಘಮಿಸುತ

 ಚೆಲ್ಲುವ ಕಂಪಿನೊಳಗು

ಇಂಪಾಗಿ ಕಂಪಿಸುತಿದೆ ನೀನೆನ್ನುವ ಸ್ನೇಹದ ಪರಿಮಳದ ನೆನಪು

ಮುಂಜಾನೆ ಹಸಿರೆಲೆಯಲಿ ಪಳಿಸುವ ಹನಿಗಳ ಹೊಳಪಿನೊಳು

ನವ್ಯತೆ ಬೆಳಗಿ ದಿನಕೆ ಸ್ವಾಗತಿಸುವ ಪರಿಯಲಿದೆ ನಿನದೆ ನೆನಪು

ದೇವ ಮಂದಿರದ ಗಂಟೆಯ ನಾದದಲೊಮ್ಮಿದ ಸ್ವರಮೇಳದೊಳು

ನಿರ್ಮಲ ಭಾವದ ಪಾವಿತ್ರತೆ ಮೂಡಿಸಿದ ನಿನ್ನಯ ನೆನಪು

ಬಾಯಾರಿದ ತನುವಿಗೆ ಜೀವ ಚೇತನದ ಸುಜಲದೊಳು

ದಣಿವಾರಿದ ಮನದ ಕೃತಜ್ಞತೆಯಲಿ ಕಾಡಿದ ನಿನ್ನಯ ನೆನಪು

ಇನನ ಹೊಂಗಿರಣದ ತೇರಿನ ಸಡಗರದ ಚಿತ್ತಾರದೊಳು

ಕನುಸಗಳಿಗೆ ರಂಗು ತುಂಬಿದ ನಿನ್ನದೇ ಸಾನ್ನಿಧ್ಯದ ನೆನಪು

ದೆಸೆತಪ್ಪಿದ ನೌಕೆಯಲಿ ಬೇಡುತ ಕುಳಿತ ಮನದೊಳು

ಸಂತೈಸುತ ಜೊತೆಯಾಗುವ ನಿನ್ನಯ ನುಡಿಗಳ ನೆನಪು

ಅರುಣೋದಯದ ನಿಬ್ಬೆರಗಿನಲಿ ಕೆಂಪಾದ ಕೆಂದಾವರೆಯೊಳು

ಜಗೆವಲ್ಲ ಚೆಲುವಾಗಿಸುವ ಸಂಭ್ರಮದೊಳು ನಿನ್ನದೇ ನೆನಪು

ಹೂಬನದ ಹೂಗಳ ಲಾಲಿತ್ಯದ ವೈಭವದ ಸೊಬಗಿನೊಳು

ನೀನೆನ್ನುವ ಕೋಮಲೆಯು ನೃತ್ಯವಾಡಿದ ಸವಿ ನೆನಪು

ಪ್ರೇಮ ಸರೋವರದ ತಂಪಲೆಯ ಸುಖದೊಳು

ಕಣ ಕಣವು ಪ್ರೇಮವಾಗಿಸುವ ಸೋಜಿಗದಲ್ಲಿದೆ ನಿನ್ನದೇ ನೆನಪು

ಸಜ್ಜನಿಕೆಯ ನಿನ್ನ ಕಾಲ್ಗೆಜ್ಜೆಯ ಅನುರಾಗದ ಮೇಳದೊಳು

ಒಲವಿನ ಬದುಕಿಗೆ ಸ್ವಾಗತಿಸುವ ನಿನ್ನ ಸೌಜನ್ಯರಾಗದ ನೆನಪು

ಸುಂದರ ಕನಸುಗಳು ಹುಟ್ಟುವ ಮನದ ಗೂಡಿನೊಳು

ನೀನೆನ್ನುವ ಪ್ರೇಮಾಮೃತಧಾರೆಯ ದಿವ್ಯತೆಯ ನೆನಪು

ಜಗೆದೆಲ್ಲ ನೋವನು ಗೆಲ್ಲುವ ಮನದಾಸೆಯ ಛಲದೊಳು

ನೀನೆನ್ನುವ ಜಯ ಕರುಣಿಸುವ ಒಲವದಾತೆಯ ನೆನಪು

ಹುಣ್ಣಿಮೆಯ ರಾತ್ರಿಯಲಿ ಬಳುಕುವ ನೈದಿಲೆಯ ಸೊಬಗಿನೊಳು

ನೀನೆನ್ನುವ ವೈಯ್ಯಾರಿಯದೇ ಬಿನ್ನಾಣದ ಮೋಡಿಯ ನೆನಪು

ತುಂಬು ಚಂದಿರನ ನಗುವಿನ ಸೌಂದರ್ಯದ ಸಿರಿತನದೊಳು

ನೀನೆನ್ನುವ ಅನುಪಮ ಚೆಲುವೆಯ ಪರಮಾಪ್ತತೆಯ ನೆನಪು

ನಿದಿರೆ ಬಾರದ ರಾತ್ರಿಯಲಿ ಕಾಡುವ ಕನಸಿನೊಳು

ನೀನೆನ್ನುವ ಬಲ್ಲಿದೆ ಒಲವ ಹೂವಾಗಿ ಅರಳಿದ ನೆನಪು

ಮಲ್ಲಿಗೆಯ ಮಾಲೆಯ ಶ್ವೇತ ವರ್ಣದ ಪಾವನ ಭಾವದೊಳು

ನೀನೆನ್ನುವ ಗೆಳತಿಯ ಹೂಮನದ ಆಮಂತ್ರಣದ ನೆನಪು

ನಭದ ತಾರೆಗಳ ಉದಿತ ಬೆಳಕಿನ ಶೋಭೆಯ ಸೊಬಗಿನೊಳು

ನಿನ್ನ ಕಣ್ಣ ಕಾಂತಿಯ ಪ್ರೇರಣೆಯ ಹೊಳಪಿನ ನೆನಪು

ಸಾಗರದೆಡೆ ಓಡುವ ನದಿಯ ಉಲ್ಲಾಸದ ಮೆರವಣಿಗೆಯೊಳು

ನಿನ್ನ ಒಲವು ನನ್ನೆಡೆಗೆ ಹಾತೊರೆವ ಕನಸಿನ ನೆನಪು...

ಕ್ಷಣ ಕ್ಷಣವು ಮಿಡಿವ ಹೃದಯದ ದನಿಯೊಳಗು

ನೀ ಜೊತೆಯಾಗುವುದು ಸತ್ಯವೆನ್ನುತಾ ಕಾದ ಘಳಿಗೆಯ ನೆನಪು..

ರಾಮಚಂದ್ರ ಸಾಗರ್

ನೋವೆ ವರವೇನು?

ನಿನ್ನ ಸಿಹಿ ನೆನಪುಗಳೇ ವಿಷದ ಕಡಲಾಗಿರಲು

ಈ ಹೃದಯಕೆ ನೋವೆ ಉಡುಗೊರೆಯು 

ನೀನಿರದ ಜಗವು ಶೂನ್ಯವು ಎನಿಸುತಿರಲು

ಈ ಬಾಳಿಗೆ ಇನ್ನು ಇಹುದೇನು ಖುಷಿಯು? 

ಪ್ರೀತಿಯ ಹಾದಿಯು ವಿರಸದ ಮುಳ್ಳಾಗಿರಲು

ಈ ಜೀವಕೆ ಹೆಜ್ಜೆಯನಿಡುವುದು ಸುಳ್ಳಾಗಿಹುದು

ಕನಸಿನ ಬದುಕು ಸುಳ್ಳೆಂದು ದಿಟವಾಗಿರಲು

ಹುಸಿ ನಗುವಿನ ಮುಖದಲಿ ಕಹಿಯೆ ಕವಿಸಿದೆ 

ಸುರಿವ ವಿರಹದ ಮಳೆಯಲಿ ನಾ ಸುಡುತಿರುವ ವೇಳೆಯಲಿ

ಮನವೆಲ್ಲ ನೋವಿನ ಬೆಂಕಿಯಲಿ ಬೇಯುತಿದೆ 

ನಗುವುದನೆ ನಾ ಮರೆತು ಜೀವವೇ ಸೊರಗಿರಲು

ನೋವಿನಲಿ ತೋಯುವುದೇ ನಾ ಕಲಿಯುತಿರುವೆ 

ಬೆಳಗುವ ಬಾಳು ಕತ್ತಲಿನ ಗುಹೆಯಾಗಿ ಕಾಡುತಿರಲು

ನರಳುವುದೆ ನಿತ್ಯ ಹೃದಯಕೆ ಕೆಲಸವಾಗಿದೆ ಗೆಳೆಯಾ

ಬೇಸರವೇ ನನ್ನನು ಸುಳಿದಾಡುವ ಅಲೆಯಾಗಿರಲು

ಬಾಳಿನ ಸಡಗರವು ಬಾಡಿದ ಹೂವಾಗಿದೆ 

ನೆನಪುಗಳೆ ಹಗಲಿರುಳು ಕಾಡುವ ಕಂಬನಿಯಾಗಿರಲು

ಸುರಿವ ಕಂಬನಿಗಳೆ ನನಗೆ ಬಹುಮಾನವೇನು?

ಮೌನವೇ ಬದುಕಿಗೆ ಜೊತೆಯಾದ ವಿಧಿಯಾಗಿರಲು

ಸವಿ ಮಾತುಗಳು ಮೌನದಿ ಸಾಯುತಿರಲು ಖುಷಿಯೇನು?

ನಿನ್ನ ಸಿಹಿ ನೆನಪುಗಳೇ ವಿಷದ ಕಡಲಾಗಿರಲು

ಈ ಹೃದಯಕೆ ನೋವೆ ನೀ ನೀಡುವ ವರವೇನು ಗೆಳೆಯಾ?

ರಚನೆ: ರಾಮಚಂದ್ರ ಸಾಗರ್

ಕನ್ನಡವೇ ಜಗವು

 

ಎಲ್ಲ ಕನ್ನಡದ ಮನಸ್ಸುಗಳಿಗೆ ಕನ್ನಡ ರಾಜ್ಯೋತ್ಸವದ ಶುಭಾಶಯಗಳು. ಎಲ್ಲರ ಹೃದಯದಲ್ಲಿ ಕನ್ನಡವು ಅವರ ಬಾಳಿನುದ್ದಕ್ಕೂ ಸತ್ಕಾರದ ಹೊನಲಾಗಿ ಕಂಗೊಳಿಸಲಿ. ನವೆಂಬರ್ ಒಂದರಂದು ಮಾತ್ರವೇ ನೆಪಕ್ಕೆ ನಡೆಯುವ  ಸಂಭ್ರಮಾಚರಣೆಗಷ್ಟೇ ನಾವುಗಳು ಸೀಮಿತವಾಗಬಾರದು. ವರ್ಷದುದ್ದವೂ ಕನ್ನಡದ ಬಗೆಗಿನ ಕಾಳಜಿ, ಗೌರವ ಸದಾ ನಮ್ಮೆದೆಯಲಿ ಮೊಳಗಲಿ..ಆಗ ನಿಜವಾಗಿಯೂ ಕನ್ನಡದ  ಅಭಿವೃದ್ಧಿಯಾಗುತ್ತದೆ ಎನ್ನುವುದು ನನ್ನ ಸಣ್ಣ ಆಸೆ..

ಈ ಸುದಿನ ನಾನು "ಕನ್ನಡವೇ ಜಗವು" ಎನ್ನುವ ಕವಿತೆಯನ್ನು ಬರೆದಿರುವೆ ಬಂಧುಗಳೆ. ಕವಿತೆಯನ್ನು ಓದಿ ಹಾರೈಸಿ..

ಕನ್ನಡವೇ ಜಗವು

ಕನ್ನಡವೇ ವರವು ಕನ್ನಡವೇ ದೈವವು

ಕನ್ನಡವೇ ಉಸಿರು ಕನ್ನಡವೇ ಸಿರಿಯು

ಕನ್ನಡವೇ ಅಮೃತವು ಕನ್ನಡವೇ ಸಂಪನ್ನವು

ಕನ್ನಡವೇ ಸಂಸ್ಕಾರವು ಕನ್ನಡವೇ ವೈಭವವು

ಕನ್ನಡವೇ ಸುಯೋಗವು ಕನ್ನಡವೇ ಸತ್ಕಾರವು

ಕನ್ನಡವೇ ಸಂಭ್ರಮವು ಕನ್ನಡವೇ ಸತ್ರವು

ಕನ್ನಡವೇ ನಿಶ್ಚಯವು ಕನ್ನಡವೇ ನಿಬ್ಬೆರಗು

ಕನ್ನಡವೇ ಬೆಳಕು ಕನ್ನಡವೇ ಬೆಡಗು

ಕನ್ನಡವೇ ಉಲ್ಲಾಸವು ಕನ್ನಡವೇ ಉನ್ನತಿಕೆಯು

ಕನ್ನಡವೇ ಸೌಖ್ಯವು ಕನ್ನಡವೇ ಸೌಂದರ್ಯವು

ಕನ್ನಡವೇ ಕಾರುಣ್ಯವು ಕನ್ನಡವೇ ಕಾರುಬಾರು

ಕನ್ನಡವೇ ಕನಕವು ಕನ್ನಡವೇ ನಾಕವು

ಕನ್ನಡವೇ ದಿವ್ಯತೆಯು ಕನ್ನಡವೇ ದಿಗಂತವು

ಕನ್ನಡವೇ ದಿಟವು ಕನ್ನಡವೇ ದೀವಟಿಗೆಯು

ಕನ್ನಡವೇ ಹುರುಳು ಕನ್ನಡವೇ ಬಲವು

ಕನ್ನಡವೇ ಅಮರವು ಕನ್ನಡವೇ ಜಗವು

ಕನ್ನಡಿಗನೆ ಪುನೀತನು ಕನ್ನಡಗನೆ ಸಜ್ಜನನು

ಕನ್ನಡಿಗನೆ ಉದಾರಿಯು ಕನ್ನಡಿಗನೆ ಉದ್ಧಾರಕನು

ಕನ್ನಡಿಗನೆ ಉದಾತ್ತನು ಕನ್ನಡಿಗನೆ ಉಚ್ಛ್ರಾಯನು

ಕನ್ನಡಿಗನೆ ಸೌಹಾರ್ದನು ಕನ್ನಡಿಗನೆ ಸೌಷ್ಠವನು

ಕನ್ನಡ ನುಡಿಯೆ ಸ್ವಾರಸ್ಯದ ದನಿಯು

ಕನ್ನಡ ನುಡಿಯೆ ಜ್ಞಾನದ ಸಿದ್ಧಿಯು

ಕನ್ನಡ ನುಡಿಯೆ ಪಾವನ ಸ್ವರವು

ಕನ್ನಡ ನುಡಿಯೆ ಹೃದಯಕೆ ಘನತೆಯು

ರಚನೆ: ರಾಮಚಂದ್ರ ಸಾಗರ್