ಪ್ರೀತಿಯ ರಥಬೀದಿಯಲಿ
ಅನುರಾಗದ ಮೆರವಣಿಗೆಯಲಿ
ಒಲವ ಮೇನೆಯೇರಿ
ನಗು ಸೂಸುವ ಮೊಗದಲಿ
ಸಾಗೋಣ ಬಾರೆ
ಪ್ರೀತಿಯ ಹೂಬೀದಿಯಲಿ
ಒಲವ ಇಂಪಿನ ಕಂಪಿನಲಿ
ಅನುಪಮ ಸ್ವರದಲಿ
ಒಲವಗೀತೆಯ ನಾದದಲಿ
ಸಾಗೋಣ ಬಾರೆ
ಪ್ರೀತಿಯ ರಂಗಿನ ಬೀದಿಯಲಿ
ಸವಿ ಕನಸಗಳ ಜೊತೆಯಲಿ
ಚಿತ್ತಾರದ ಬದುಕಿನಾಸೆಯಲಿ
ಸಿದ್ಧಿಸುವ ಬಾಳ ಕಮ್ಮಟದಲಿ
ಸಾಗೋಣ ಬಾರೆ
ಪ್ರೀತಿಯ ಕರುಣೆಯ ಹಾದಿಯಲಿ
ದಯೆ ತುಂಬಿದ ಮನದಲಿ
ನವ ಬದುಕಿನ ಸ್ವಾಗತದಲಿ
ಹಂಗಿರದ ನುಡಿಗಳಲಿ
ಸಾಗೋಣ ಬಾರೆ
ಪ್ರೀತಿಯ ಸೋಜಿಗದ ಹಾದಿಯಲಿ
ಮಾಧುರ್ಯದ ಸ್ವರ್ಗದಾಸೆಯಲಿ
ಮಧುರ ಸಾಂಗತ್ಯದಲಿ
ಮನಸ್ಸುಗಳ ಲೀನದ ಲೀಲೆಯಲಿ
ಸಾಗೋಣ ಬಾರೆ
ರಾಮಚಂದ್ರ ಸಾಗರ್
ಯಾಚನೆ ಎಂಬುದು ಕೊನೆಯಾಗುವುದೆ
ಹಸಿವಿನ ನೋವು ಮರೆಯಾಗುವುದೆ
ಪಾಮರನ ಎದೆಯಲಿ ದಯೆಯರಳುವುದೆ
ಬಡವನ ಮನೆಯಲಿ ಕಣ್ಣೀರು ಕರಗುವುದೆ?
ಹಸಿವು ಎಂಬುದಕ್ಕೆ ಜಾತಿಯಲ್ಲಿದೆ
ಅನ್ನ ನೀರು ಗಾಳಿಗೆ ಬೇದವೆಲ್ಲಿದೆ
ಶ್ರಮಿಕ ತನುವಿಗೆ ನಲಿವೆಲ್ಲಿದೆ
ಬೇಡುವ ಜೀವಕೆ ರಕ್ಷೆಯೆಲ್ಲಿದೆ!
ಬೇಡಿದ್ದೆಲ್ಲ ಜಗದೊಳು ದಕ್ಕರೆ
ದುಡಿದಿದ್ದೆಲ್ಲ ಜೋಳಿಗೆ ತುಂಬಿದರೆ
ಭಾಗ್ಯದ ಉಡುಗೊರೆ ಅರ್ಹನಿಗೆ ಒಲಿದರೆ
ನೀರು ಸುರಿಸುವ ಕಣ್ಣಿಗೆ ಕೆಲಸವಿಲ್ಲಿದೆ?
ಕೃಪಣದ ಮನವು ದಹನವಾಗುವುದೆ
ಸೊರಗಿದ ಜೀವಗಳು ನಗುವುದೆ
ನಿತ್ರಾಣ ಎಂಬುದು ಕೊನೆಯಾಗುವುದೆ
ಸಂಭ್ರಮವು ಜಗದಲಿ ನೆಲೆಯಾಗುವುದೆ?
ಧನಹೀನನ ಧನವಂತನು ಅಪ್ಪುವುದೆಂದು
ಯಾಚಕ ನಾಯಕನಾಗುವುದೆಂದು
ಹತಾಶೆಯ ಮಳೆ ನಿಲ್ಲುವುದೆಂದು
ಬಡವನ ಗುಡಿಸಿಲಲಿ ದೀಪಾವಳಿಯೆಂದು?
ರಾಮಚಂದ್ರ ಸಾಗರ್
ಕೆಂಗುಲಾಬಿ ನೀ ನೀಡಿದ ಹಾದಿಯಲಿ
ಪ್ರೀತಿಯ ಶುಭವಾಣಿ ನೀ ನುಡಿದ ಸವಿಯಲಿ
ಮೋಹದ ಬಂಧದ ಅಕ್ಕರೆಯ ಹಿತದಲಿ
ಕಾದಿರುವೆ ಗೆಳೆಯ ನಿನಗಾಗಿ
ನಿನ್ನೊಲುಮೆಯ ಪಥದ ಒಲುಮೆಗಾಗಿ
ಪ್ರೀತಿಯ ಸತ್ಕಾರ ನೀ ಕರುಣಿಸಿದ ಹಾದಿಯಲಿ
ಒಲವರಾಧನೆಯ ಜಪದಲಿ
ಲಕ್ಷ ಲಕ್ಷ ಕನಸುಗಳ ಜೊತೆಯಲಿ
ಕಾದಿರುವೆ ಗೆಳೆಯ ನಿನಗಾಗಿ
ನಿನ್ನೊಲುಮೆಯ ಸತ್ಕಾರದ ಪ್ರೀತಿಗಾಗಿ
ಬಾಳಿಗೆ ಸದ್ಗತಿ ನೀ ನೀಡಿದ ಹಾದಿಯಲಿ
ಸಂಬ್ರಮದ ಬದುಕಿನ ಕನಸಿನಲಿ
ಜೊತೆಯಾಗಲು ನಿನ್ನೊಲವ ಮೆರವಣಿಗೆಯಲಿ
ಕಾದಿರುವೆ ಗೆಳೆಯ ನಿನಗಾಗಿ
ನಿನ್ನೊಲುಮೆಯ ಸದ್ಗತಿಯ ಬಾಳಿಗಾಗಿ
ಹೃದಯದ ಲಯ ನೀ ತಪ್ಪಿಸಿದ ಹಾದಿಯಲಿ
ಮೋಹದ ಪಾಶ ನೀ ಎಳೆದ ಮನದಲಿ
ಅವಿರತ ಕಾಡುವ ನಿನ್ನ ನೆನಪಿನಲೆಯಲಿ
ಕಾದಿರುವೆ ಗೆಳೆಯ ನಿನಗಾಗಿ
ನೀ ಕೈಹಿಡವ ಘಳಿಗೆಗಾಗಿ
ಒಂಟಿ ಜೀವದ ನೋವಿಗೆ ಕೊನೆಹಾಡಲು
ಉಲ್ಲಾಸದ ಬದುಕು ಪುಟಿದೇಳಿಸಲು
ಭೋರ್ಗರೆವ ಬವಣೆಯ ಹಾದಿಯಲಿ
ಕಾದಿರುವೆ ಗೆಳೆಯ ನಿನಗಾಗಿ
ನೀ ತರುವ ಸೌರಭದ ನಗುವಿಗಾಗಿ
ರಾಮಚಂದ್ರ ಸಾಗರ್
ಮುಸ್ಸಂಜೆ ರಂಗು ನಮಗೆ ಹೊನ್ನೆಂದು ನಕ್ಕವನು
ಜಗದ ಸೊಬಗು ರಮ್ಯತೆಯ ಗೂಡಾಗಿರಲು
ಹೊಳೆವ ಸೊಬಗಿನ ಹಾದಿಯಲಿ ನಡೆಸಿದವನು
ಮನದ ದುಗುಡ ಮರೆಸಿ ನಲಿಸಿದವನು
ಬಿರುಗಾಳಿ ಬೀಸುವಾಗ ಅಭಯದಾ ಬೆಸುಗೆಯಲಿ
ಕೈಹಿಡಿದು ಜಗವ ಮುದ್ದಾಗಿ ತೋರಿದ ಜೀವಾತ್ಮನು
ಕಾಂತಾರದ ದುರ್ಗಮದಲಿ ಅಳುಕಿನ ಹಾದಿಯಲ್ಲಿ
ಕೈದೀಪವಾಗಿ ದಾರಿ ತೋರಿದ ಚಂದ್ರಮನು
ಕಿರುಬೆರಳಿಗೆ ನಗುತ ಸಾಂಗತ್ಯ ನೀಡಿ
ಮುಳುಗುವ ರವಿಯು ಮತ್ತೆ ಬರುವನು
ಕಹಿ ಕರಗಿ ಸಂತಸ ಸಡಗರ ತರುವನು
ದುಗುಡವಡಗಿಸಿ ಬೆಳಗು ಮೂಡಿಸುವನು
ನೀ ಅಳುಕದಿರು ಎಂದವನು
ಇಳೆ ತಬ್ಬುವ ಕಪ್ಪಿರುಳು ಛಾಯೆಯಲಿ
ಛಲದ ಮಾತಗಳಲಿ ಎಳೆಮನ ಬಲಿಸಿದವನು
ನೋವೆಂಬುದು ಅಪ್ಪುವ ಆರ್ಭಟದಲು
ನಗುವೆ ಉತ್ತರವಾಗಿಸಿ ಛಲದ ಚೈತನ್ಯವಾದವನು
ನೋವಿನ ಹನಿಗಳು ಕರಗುವುದು
ಬದುಕಿನ ಕನಸು ಅರಳುವುದು
ನೋವುಂಡ ಜೀವಕೆ ಗೆಲುವೆಂದು
ಶಕ್ತ ಬಾಳಿಗೆ ಮುನ್ನುಡಿ ಬರೆದವನು
ನೀನೆ ಜೀವದ ಜೀವಾತ್ಮನು
ರಾಮಚಂದ್ರ ಸಾಗರ್
