ಸಿಹಿ ನೆನಪುಗಳು.,..

ಚಿನ್ನದಂತ ನಿನ್ನ ಸಿಹಿ ನೆನಪುಗಳು
ಮೆತ್ತನೆ ನನ್ನ ಹೆಗಲೇರಿ ಕುಳಿತಿರಲು
ಗೆಳತಿ ನಾ ಭಾರವಾದ ಮನದಲ್ಲಿ 
ಏಕಾಂಗಿ ನಾನೆಷ್ಟು ದೂರ ಸಾಗಲಿ..

ಒಂಟಿ ಜೀವ ನಾನೆಷ್ಟು ನೋವು ಸಹಿಸಲಿ
ಮುಳ್ಳು ಪಥದಲಿ ನಾ ಹೇಗೆ ಸಾಗಲಿ
ಸುಳ್ಳು ಮಾತಲಿ ಹೃದಯ ಹೇಗೆ ಸಂತೈಸಲಿ
ಬಿರು ಬೇಗೆಯಲಿ ಎಲ್ಲಿ ನಾನು ನೆಲೆಯಾಗಲಿ..

ಹಗಲು ರಾತ್ರಿ ಬಿಡುವು ನೀಡದೆ
ಅರೆ ನಿಮಿಷ ಸುಖವು ಕಾಣದೆ
ನಿನ್ನೊಲವಾರಾಧನೆಯ ಜಪದಲೆ
ಮನಸು ನೊಂದಿದೆ ವಿಧಿಯಿಲ್ಲದೆ...

ಬೆಳುದಿಂಗಳು ಹೊಳಪು ಹಿತವೆನಿಸದು
ತಂಗಾಳಿಯು ತಣಿವು ನೀಡದು
ಹೂಕಂಪು ಸೌಗಂಧವು ಸವಿಯೆನಿಸದು
ಅನ್ನ ನೀರು ತನುವು ಬೇಡದು..

ಗೆಳತೀ..
ನೀ ಬಾರದೇ ಭಾರವಾದ ಮನದಲ್ಲಿ 
ಒಂಟಿ ನಾನೆಷ್ಟು ದೂರ ಸಾಗಲಿ
ಮುಳ್ಳು ಕಂಟಿಯ ಹಾಸಿಗೆಯಲ್ಲಿ 
ಹೊದ್ದು ನಗುತ ಹೇಗೆ ಮಲಗಲಿ

          ರಾಮಚಂದ್ರ ಸಾಗರ್

ಪ್ರೀತಿಯ ಮಾಲೆ

ಪ್ರೀತಿ ಎಂಬುದು ನನ್ನೆದೆಯಲಿ 
ನೀ ಬರೆದ ಅಕ್ಕರೆಯ ಮಾಲೆ
ಪ್ರೀತಿ ಎಂಬುದು ನನ್ನ ಮನದಲ್ಲಿ 
ನೀ ಹೆಣೆದ ಒಲವ ಮಾಲೆ..

ಪ್ರೀತಿ ಎಂಬುದು ನನ್ನ ಲೇಖನಿಯಲಿ 
ನೀ ಅಚ್ಚಾಗಿಸಿದ ಒಲವ ಪದಮಾಲೆ
ಪ್ರೀತಿ ಎಂಬುದು ಬಾಳ ಹೂದಾರಿಯಲಿ
ನೀ ಚೆಲ್ಲಿದ ಬೆಳುದಿಂಗಳ ಮಾಲೆ..

ಪ್ರೀತಿ ಎಂಬುದು ಜಾರುವ ಕಂಬನಿಯಲಿ
ನಗು ಮರಳಿಸುವ ನಿನ್ನ ಸಾನಿಧ್ಯಮಾಲೆ
ಪ್ರೀತಿ ಎಂಬುದು ಸುಡುವ ವೇದನೆಯಲಿ
ತಣಿವು ತುಂಬುವ ನಿನ್ನ ಅಭಯಮಾಲೆ..

ಪ್ರೀತಿ ಎಂಬುದು ಬಿರುಗಾಳಿಯಲಿ
ರಕ್ಷೆ ನೀಡಿದ ನಿನ್ನ ಮಡಿಲಾಸರೆಯ ವಾತ್ಸಲ್ಯಮಾಲೆ
ಪ್ರೀತಿ ಎಂಬುದು ಕಹಿ ಘಳಿಗೆಯಲಿ
ಸಿಹಿ ತುಂಬುವ ನಿನ್ನ ಅನುರಾಗದ ಮಾಲೆ..

ಪ್ರೀತಿ ಎಂಬುದು ಬಾಳ ಮಾಧುರ್ಯದಲಿ
ನೀ ತುಂಬಿದ ಸವಿಜೇನಿನ ಮಾಲೆ
ಪ್ರೀತಿ ಎಂಬುದು ಬಾಳ ನಕಾಸೆಯಲಿ
ನೀ ಚೆಲ್ಲಿದ ಒಲವ ರಂಗಿನ ಮಾಲೆ..

ರಾಮಚಂದ್ರ ಸಾಗರ್

ಹೊಳಪಿದೆ..

ನಗುವ ನಿನ್ನ ನಯನದಲ್ಲಿ
ಸಾವಿರ ಕನಸು ಅರಳಿದೆ
ನಯನಕಾಂತಿ ಹೊಳಪಿನಲ್ಲಿ
ಬಾಳಿಗೆ ಭವ್ಯ ಹೊಳಪಿದೆ.. 

ನಿನ್ನೊಲವ ರಂಗಿನ ಜಗದಲಿ
ಪ್ರೀತಿಯ ಜಲಧಿ ಉಕ್ಕಿದೆ
ನವಿರು ದನಿಯ ಹಿತದಲಿ
ಸಹಿತ ಬಾಳುವ ಛಲವಿದೆ..

ಪ್ರೀತಿ ಅಂದಣದ ಮೆರವಣಿಗೆಯಲಿ
ಕೈಹಿಡಿದು ಸಾಗುವ ಮಾತಿದೆ
ಅಜರಾಮರ ಒಲವಾರಾಧನೆಯಲ್ಲಿ
ಜಗ ಜಯಿಸುವ ಜಪವಿದೆ..

ಅವಿರತ ಕಾಡುವ ಕನಸಿಗೆ
ವಿಶ್ರಾಂತಿ ಕಾಣುವ ಕನಸಿದೆ
ಅನುಪಮ ಪ್ರೀತಿ ಪದಗಳಿಗೆ
ಒಲವ ಗೀತೆಯ ಕಳೆಯಿದೆ..

ನಗುವ ನಿನ್ನ ನಯನದಲ್ಲಿ
ಹೊಸತರ ಹೊಳಪಿದೆ
ಕಳೆಯೇರುವ ಜಗದಲಿ
ನಿನ್ನೊಲವ ರಂಗಿನ ಸೊಬಗಿದೆ..

ರಾಮಚಂದ್ರ ಸಾಗರ್

ನಿನ್ನ ಹೂ ನಗುವಿಗಾಗಿ

ಮೆಲುನಗುವ ನಿನ್ನ ಮೋಹದಲಿ
ಬಂಧಿಯಾಗಿದೆ ನನ್ನ ಮನಸು
ಮೆಲುನಗುವ ನಿನ್ನ ಸೊಬಗಿನಲ್ಲಿ
ಮೈಮರೆತಿದೆ ನನ್ನ ಮನಸು

ಹೂನಗುವ ನಿನ್ನ ರಂಗಿನಲ್ಲಿ
ಬದುಕಲಿ ಬಣ್ಣ ತುಂಬಿದೆ ಕನಸು
ಪಳಿಸುವ ನಿನ್ನ ನಯನದಲ್ಲಿ
ಬದುಕಲಿ ಬೆಳಗುತಿದೆ ಒಲವದೀಪ

ಕುಣಿವ ನಿನ್ನ ಮುಂಗುರುಳಿನಲ್ಲಿ
ಆಹ್ವಾನವಿದೆ ನನ್ನ ಮನಕೆ
ಕುಡಿ ನೋಟದ ನಿನ್ನ ಒಲುಮೆಯಲ್ಲಿ
ಅನುರಾಗದ ಬಲವಿದೆ ಮನಕೆ

ಅಕ್ಕರೆಯ ನಿನ್ನ ನಗುವಿನಲ್ಲಿ
ಮನಕೆ ಲವಲವಿಕೆಯ ಲಯವಿದೆ
ಸಕ್ಕರೆಯ ನಿನ್ನ ಮನದಲ್ಲಿ
ನನ್ನ ಹೆಸರಿಗೆ ಜಾಗವಿದೆ

ಪ್ರೀತಿಯ ನಿನ್ನ ಸಾನಿಧ್ಯದಲಿ
ಮೌನಿಯಾಗಿದೆ ಮನಸು
ನಿನ್ನೊಲವರಾಧನೆಯ ಜಪದಲಿ
ಸಿಹಿಯಾಗಿದೆ ಮನಸು..

ನಿನ್ನ ನಗುಮೊಗದ ದರ್ಶನಕೆ
ಅನುರಾಗದ ಅಕ್ಕರೆಗೆ
ಗೆಳತಿ ಕಾದಿರುವೆ  ನಿನಗಾಗಿ..
ನೀ ನೀಡುವ ಹೂ ನಗುವಿಗಾಗಿ..

ರಾಮಚಂದ್ರ ಸಾಗರ್