ಹುಲು ಮಾನವ ನೀನಾಗದಿರು
ಬಲವಿಲ್ಲದ ಸತ್ವದ ಜೊತೆಯಲಿ
ಸಮಯದ ಕ್ಷಯ ಮಾಡದಿರು
ಹುರಿಯಾಳು ಇರುವ ಜಗದಲಿ
ಗೆಲುವು ತನ್ನದೆಂದು ಮೈಮರೆಯದಿರು
ಹುರಿದು ಹೊಸೆದ ಜೀವದಲಿ
ನಲಿವು ನಲಿದಾಡುವುದು ಮರೆಯದಿರು
ಹುಸಿ ಮಾತಿನ ಮಹಲಿನಲ್ಲಿ
ಮುಗ್ಧರ ಮನ ಘಾಸಿಗೊಳಿಸದಿರು
ಅಸತ್ಯದ ಬಲೆಯ ಮೋಹದಲಿ
ನಂಬಿದವರ ಬೀಳಿಸಿ ನಗದಿರು
ಹುಗಿ ತುಂಬಿದ ನದಿಯಲಿ
ದೋಣಿ ಸಾಗದು ಮರೆಯದಿರು
ಹುಳಿ ತುಂಬಿದ ಮನದಲಿ
ನಗುವು ಅರಳದು ತಿಳಿದಿರು
ಹುಂಬ ಮನದ ಮತಿಯಲಿ
ವಿವೇಕ ಮುದುಡುವುದು ತಿಳಿದಿರು
ಹುಡಿಮಾಡಿದ ಜನರ ಮನದಲಿ
ಸಾಮರಸ್ಯ ಸಾಯುವುದು ಅರಿವಿರಲಿ
ಹುಳು ಹರಿದಾಡುವ ವನದಲಿ
ಸೊಬಗು ಮರೆಯಾಗುವುದು ನಿಶ್ಚಯವು
ಹುಳುಕಾದ ಸಮಾಜದ ನಡೆಯಲಿ
ಜಗವು ಬವಣೆಯಲಿ ಬೇಯುವುದು ದಿಟವು
ರಾಮಚಂದ್ರ ಸಾಗರ್
