ನೀ ಇರದ ದಿನಗಳು ಕಹಿಯೆಂದಿವೆ
ಸುಖವೆಲ್ಲಿದೆ ನಲಿವೆಲ್ಲಿದೆ ಚೆಲುವೆ
ನೀ ಬಾರದ ಕ್ಷಣಗಳು ಕಳೆಗುಂದಿವೆ
ಹೃದಯವು ಕಳವಳಿಸಿದೆ ತಳಮಳಿಸಿದೆ
ನೀ ಬಾರದ ಬದುಕು ಉರುಳೆಂದಿದೆ
ಆನಂದವು ಒಲವಾಲಾಪವು ಮರೆಯಾಗಿದೆ
ನೀ ಜೊತೆಯಿರದ ಹಾದಿಯು ಮುಳ್ಳಾಗಿದೆ
ಸಡಗರವು ಸಂಭ್ರಮವು ಮರೀಚಿಕೆಯಾಗಿವೆ
ನೀ ನಲಿಯದ ಸೌಧವು ಮಸಣವಾಗಿದೆ
ಸಂತಾಪವು ಸಂತಪ್ತವು ಜೊತೆಯಾಗಿವೆ
ನೀ ಒಲಿಯದ ಬಾಳು ಅಳಲಾಗಿದೆ
ಸಮ್ಮೋಹವು ಸಮಾಗಮವು ಬರಿ ಕನಸಾಗಿವೆ
ನೀ ಕೈಹಿಡಿಯದ ಜಗವಿನ್ನು ನನಗೇತಕೆ?
ಸಂದೇಹವು ಅನುಮಾನವು ಒಳನುಸುಳಿತೆ
ನಾ ಹಂಬಲಿಸಿದ ಪ್ರೀತಿಗೆ ಕೈಕೊಳವಾಯಿತೆ?
ನೀ ಬಾರದೇ ನೀ ನಗು ನೀಡದೇ
ಕಂಪಿಸಿದ ಕನಸುಗಳು ಕಣ್ಣೀರಾಗಿವೆ
ನೀ ಆಗಮಿಸದೆ ನೀ ಮನ ಬೆಸೆಯದೆ
ಸಜೆ ನೀಡುವ ನದಿಯು ಈ ಬಾಳಾಗಿದೆ
ರಾಮಚಂದ್ರ ಸಾಗರ್
