ಎದೆಯ ದನಿಯಾಗು ಬಾ

ಗೆಳತಿ
ವಿಷವಾಗಿ ಕಾಡುತಿದೆ ಹೃದಯಕೆ
ನಿನ್ನ ಮೋಹದ ಪಾಶದ ಕುಣಿಕೆ
ಅತಿಯಾಗಿ ಕೊಲ್ಲುತಿದೆ ಮನಸಿಗೆ
ನಿನ್ನ ಸವಿ ನೆನಪಿನ ಸಿಹಿ ಕಾಣಿಕೆ

ಎದೆಯ ಒಲುಮೆಯ ದನಿಯೊಳಗು 
ನಿನ್ನದೆ ಹಗಲಿರುಳು ಮೊರೆತವು
ಒಲವಿನ ವೈಭವದ ಹಾದಿಯೊಳಗು 
ನೀನಿರದೆ ಮೌನದ ಅಭಿಷೇಕವು

ತಂಪಿರುಳು ಕಾಡುವ ಕನಸಿನೊಳಗು 
ನೀನಿರದೆ ಕ್ಷಣ ಕ್ಷಣವು ಸಪ್ಪೆಯು
ಸೌಂದರ್ಯ ಸಂಕಲನದ ಜಗದೊಳಗು 
ನೀನಿರದೆ ಸೊರಗಿದೆ ಚೆಲುವೆಲ್ಲವು

ಅನುರಾಗದ ಪ್ರೇಮ ನೌಕೆಯೊಳಗು
ನೀ ಜೊತೆಯಿರದೆ ನೀರವತೆಯ ನರ್ತನವು
ಶುಭದ ನಾದದ ಸ್ವರಮೇಳದೊಳಗು
ನೀ ಗುನುಗದೆ ಅನುರಾಗವು ಅಪೂರ್ಣವು

ಅಶೇಷ ಪ್ರೀತಿಯ ಕಡಲೊಳಗು
ನೀ ಸುಡುವ ಅಲೆಯಾಗಿ ಬೀಸದಿರು
ಬಯಸಿದ ಜೀವಕೆ ಕನಸಾಗಿ ಉಳಿಯದಿರು
ಪ್ರೀತಿಸಿದ ಮನಸಿಗೆ ಮುಳ್ಳಾಗಿ ಚುಚ್ಚದಿರು

ನೀ ಎದೆಯ ದನಿಯಾಗು ಬಾ
ಒಲವಸುತೆಯಾಗು ಬಾ 

ರಾಮಚಂದ್ರ ಸಾಗರ್