ಏನೆಂದು ಸಂತೈಸಲಿ

ಗೆಳೆಯಾ..
ಮುಸ್ಸಂಜೆಯ ತಂಪು ಕಡಲ ತೀರದಲಿ
ಅವಿರತ ಕಾಡುವ ನೆನಪುಗಳ ಸುಳಿಯಲಿ
ನಿನ್ನ ಮೋಹದ ಪಾಶದ ಕನಸುಗಳಿಗೆ
ನಾ ಏನೆಂದು ಸಂತೈಸಲಿ

ನನ್ನೆದೆಯ ಗೂಡು ನೋವಿನ ಕಡಲಾಗಿರಲು
ಕಾಡುವ ನೆನಪುಗಳು ದಿನವು ಸುಡುತಿರಲು
ಎದೆಯ ದನಿಯು ನಿನ್ನನೇ ಬೇಡುತಿರಲು
ನೀನೆಂದು ಆಗಮಿಸುವೆ

ಎದೆಯ ಗೂಡಲಿ ಎದ್ದ ನೋವಿನಲೆಯಲಿ
ನನ್ನೆದೆಯ ಕನಸು ಬೂದಿಯಾಗುತಿರಲು
ಬಾಧಿಸುವ ವಿರಹದ ಸುಡುವ ಅಲೆಗಳನು
ನೀನೆಂದು ಸಂತೈಸುವೆ

ಪ್ರೀತಿಯ ಹಾದಿಯಲಿ ಎದ್ದ ಮುಳ್ಳುಗಳನು
ಒಲುಮೆಯ ನಗುವಿನಲೆಯ ಅಕ್ಕರೆಯಲಿ
ನಗುತ ಜೊತೆಯಾಗಿ ಕೀಳುವೆಯೇನು
ನೀ ಜೊತೆಯಾಗಿ ನಡೆಸುವೆಯೇನು?

ಅಮಲೇರಿಸುವ ಹುಚ್ಚು ಆಸೆಗಳಿಗೆ
ಒಂಟಿ ಜೀವ ನಾ ಹೇಗೆ ಸಂತೈಸಲಿ
ನೋವುಂಡ ಮನದಲಿ ಹೇಗೆ ಬದುಕಲಿ
ನೀ ಬಾರದೇ ಉಳಿವೆನೇನು?

ಕಡಲಲೆಯ ನಿನದ ನವಿರು ದನಿಗೆ
ಮನದಾಸೆಗೆ ಏನೆಂದು ಉತ್ತರಿಸಲಿ
ನೀನಿರದ ಕಹಿ ಘಳಿಗೆಯಲಿ
ಒಂಟಿ ಹೃದಯ ನಾನೆಷ್ಟು ನೋವು ಸಹಿಸಲಿ?

ರಾಮಚಂದ್ರ ಸಾಗರ್