ಅನುರಾಗದ ಪದಗಳಲಿ ನೀ ಮಧುರವಾಗಿ ಗುನುಗುವಾಗ
ಎದೆಯ ಗೂಡಲಿ ಒಲವ ಜಲಧಿ ಉಬ್ಬರಿಸಿದೆ
ಪ್ರೀತಿಸುವ ಇರಾದೆಯು ಮನದಲ್ಲಿ ಅಬ್ಬರಿಸಿದೆ..
ಮೆಲುನಗುವ ನಿನ್ನ ಸೊಬಗಿನಲಿ ಹೊಸಕಾವ್ಯ ಅರಳಿದಾಗ
ಬೀಸುವ ಕಡಲಲೆಗಳು ಹಾರೈಸಲು ಬಳಿ ಬಂದಾಗ
ಒಂಟಿ ಬದುಕು ನಿನ್ನಾಸರೆಯ ಬೇಡಿದೆ
ಮೋಹದ ನಿನ್ನ ಬಂಧದಲಿ ಹಂಬಲಿಸುತ ಮನ ಸೆರೆಯಾಗಿದೆ..
ಸಾಗರಿಯ ತಡಿಯಲಿ ತಂಗಾಳಿ ಬೀಸಿದಾಗ
ದಣಿದ ಮನದಲಿ ಉಲ್ಲಾಸ ಬೀಗಿದಾಗ
ಸಂಭ್ರಮಿಸು ಘಳಿಗೆಯಲಿ ನಿನ್ನ ನವಿರು ಸ್ಪರ್ಷದ ಸುಖದಲಿ
ಹೊಂಗನಸುಗಳು ಹೆಜ್ಜೆ ಹೆಜ್ಜೆಗೂ ಕಾಡಿವೆ..
ಮೆಲು ನಗುವ ನಿನ್ನ ಮೊಗವು ನಲುಮೆಯ ನೆಲೆಯಾದಾಗ
ರಂಗು ತುಂಬಿದ ಕನಸುಗಳ ಚಿತ್ತಾರ ಬಿಡಿಸಿದಾಗ
ನಿನ್ನೊಲುಮೆಯ ರಥದಲಿ ಮನಸು ನಿನ್ನೊಂದಿಗೆ ನಲಿದಿದೆ
ಅಕ್ಕರೆಯ ಪಥದಲ್ಲಿ ನಗುತ ತನುವು ನಿನ್ನೊಂದಿಗೆ ಸಾಗಿದೆ..
ರಾಮಚಂದ್ರ ಸಾಗರ್
