ನೋವ ಶರಧಿಯಿಂದ ಮೇಲೆತ್ತಿಬಿಡು

ಗೆಳೆಯಾ..
ನೀ ಬರುವುದಾದರೆ ಬಂದುಬಿಡು
ಕನಸಲಿ ಕನಲಿಸಿ ಕಾಡದಿರು
ನೀ ಜೊತೆಯಾಗುವುದಾರೆ ಜೊತೆಯಾಗಿಬಿಡು
ಮರೆಯಲುಳಿದು ನೋವನು ನೀಡದಿರು..

ನೋವ ಶರಧಿಯಲ್ಲಿ ನೊಂದಿಹೆನು
ನಿನಗಾಗಿ ಬೇಡುವ ಜೋಗಿಣಿ ನಾನು
ಜೋಲಾಡುವ ಬದುಕಿಗೆ ಜೊತೆಯಾಗು
ನಗು ಮರೆತ ಮೊಗದಲಿ ನಗುತುಂಬು..


ಕಾತರದ ಮನಸನು ಸಂತೈಸು
ಕಾಂತಾರದ ದಾರಿಯಲು ನೀ ನಡೆಸು
ಬಾಳ ನಾವೆಗೆ ನಾವಿಕನಾಗು
ನನ್ನೆದೆಯಾಸೆಗೆ ಜೇನಾಗು..

ನನ್ನೆದೆ ಗೂಡಲಿ ಕಾರುಬಾರು ನೀ ನಡೆಸು
ಕಾಠಿಣ್ಯದ ನೋವನು ಹೂವಾಗಿಸು
ಕಾರುಣ್ಯದ ಒಲವು ನೀ ನೀಡು
ಕಾತರಿಸುವ ನನ್ನನೂ ನೀ ರಮಿಸು..

ಗೆಳೆಯಾ..
ನೀ ನಗುತ ನನ್ನೆಡೆ ಬಂದುಬಿಡು
ನೋವ ಶರಧಿಯಿಂದ ಮೇಲೆತ್ತಿಬಿಡು
ಕಾರುಣ್ಯದ ಒಲವು ನೀ ನೀಡು
ಕಾತರಿಸುವ ನನ್ನನೂ ನೀ ರಮಿಸು..

           ರಾಮಚಂದ್ರ ಸಾಗರ್