ನೀ ಬಾರದೆ ಜೊತೆಯಲ್ಲಿ
ಬಾಳ ದಾರಿಯು ಸಾಗುವುದೇನು
ನೀ ಜೊತೆಯಾಗದೆ ಬಾಳಲ್ಲಿ
ಈ ಜೀವವು ಉಳಿವುದೇನು..
ನೀ ನರ್ತಿಸದೆ ಹೂಬನದಲ್ಲಿ
ಹೂಬನವು ಚೆಲುವಾಗುವುದೇನು
ನೀ ನುಡಿಯದೆ ಕಿವಿಯಲ್ಲಿ
ಈ ಹೃದಯ ಬಡಿವುದೇನು..
ನೀ ಹಾಡದೆ ಒಲವ ಹಂದರದಲ್ಲಿ
ಒಲವ ಗೋಪುರ ಉಳಿವುದೇನು
ನೀ ನಡೆಸದೆ ಬಾಳ ದಾರಿಯಲ್ಲಿ
ಈ ತನುವು ತುಸು ಸಾಗುವುದೇನು..
ನೀ ರಮಿಸದೆ ಮನದ ಮನೆಯಲ್ಲಿ
ನಾ ಉಳಿವೆನೆ ಅರೆಘಳಿಗೆ ಜಗದಲ್ಲಿ
ನೀ ನಸುನಗದೆ ನನ್ನ ಬಾಳಲ್ಲಿ
ಒಲವ ದೀವಟಿಗೆ ಬೆಳಗುವುದೇನು..
ನೀ ಬರದೆ ಕನಸಲ್ಲಿ
ಆ ಇರುಳು ಉರುಳುವುದೇನು
ನೀ ಕಾಣದೆ ಮುಸ್ಸಂಜೆ
ಬಾನ ರಂಗು ಕಳೆಯೇರುವುದೇನು..
ನೀ ಕಾಣದ ಜಗದಲ್ಲಿ
ಒಲವ ರಂಗು ಉಳಿವುದೇನು
ಒಲವ ನಾವೆಯು ಸಾಗುವುದೇನು
ಈ ಜೀವವು ಉಳಿವುದೇನು...
ಜೀವದಾ ಉಸಿರು
ನೀ ಬರುವೆಯೇನು
ಒಲವಿನಾ ಒಸಗೆ
ನೀ ತರುವೆಯೇನು..?
ರಾಮಚಂದ್ರ ಸಾಗರ್
