"ಭಾರತೀಯನೆಂದು ಹೆಮ್ಮೆಯಿಂದ ಬೀಗು"

 

ಎಲ್ಲ ದೇಶಾಭಿಮಾನಿಗಳಿಗೂ 75ನೇ ಸ್ವಾತಂತ್ರ್ಯೋತ್ಸವ ದಿನಾಚರಣೆಯ ಶುಭಾಶಯಗಳು.
ದೇಶ ಸಾಕಷ್ಟು ಅಭಿವೃದ್ಧಿಯತ್ತ ದಾಪುಗಾಲಿಡುತ್ತಾ ಇತ್ತೀಚಿನ ವರ್ಷಗಳಲ್ಲಿ ಭಾರತವೆಂದರೆ ವಿಶ್ವದ ಹೃದಯ ಎನ್ನುವಂತಹ ಮಾತುಗಳು ವಿಶ್ವದೆಲ್ಲೆಡೆ ರಾರಾಜಿಸುತ್ತಿದೆ, ಜಗತ್ತಿನಲ್ಲಿ ಎಲ್ಲೇ ಹೋದರು ಭಾರತೀಯನಿಗೆ ಸಿಗುವ ಗೌರವ ಅಪಾರ. ಸುಂದರ ಸಂಸ್ಕಾರವಂತ ಮನದ ದೇಶ ನಮ್ಮದು ಎನ್ನುವುದು ನಮ್ಮೆಲ್ಲರ ಹೆಮ್ಮೆ.

ಈ ಸಂಭ್ರಮದ ಸಮಯದಲ್ಲಿ ನಾ ಬರೆದ ಕವಿತೆ, "ಭಾರತೀಯನೆಂದು ಹೆಮ್ಮೆಯಿಂದ ಬೀಗು" ಮತ್ತೊಮ್ಮೆ ಪೋಸ್ಟ್ ಮಾಡುತ್ತಿರುವೆ, ಓದಿ ಹಾರೈಸಿ..

ಎಲ್ಲರಿಗೂ ಇನ್ನೊಮ್ಮೆ ಶುಭಾಶಯಗಳು..

ಭಾರತೀಯನೆಂದು ಹೆಮ್ಮೆಯಿಂದ ಬೀಗು

ಕೋಟ್ಯಾಂತರ ಜೀವಿಗಳ ಉಸಿರು

ಸೌಹಾರ್ದ ಸಮ್ಮೇಳನದ ಬೀಡು

ವೈವಿಧ್ಯತೆಮಯ ಸಂಸ್ಕೃತಿಯ ತೇರು

ಭರತ ಭೂತಾಯ ಮಡಿಲು ...

ಜ್ಞಾನಸೆಲೆಯ ಅಮೃತ ಸಿಂಚನವು

ಸಹಿಷ್ಣುತೆ ಸಂದೇಶ ಸಾಗರವು

ಶಾಂತಿಯ ಸತ್ವದ ದೀವಟಿಗೆಯು

ಭರತ ಭೂತಾಯ ನೆಲೆಯು..

ಜಗಕೆ ಶಾಂತಿ ಬೋಧಿಸಿದ ನಾಡು

ಜಗಕೆ ಜ್ಞಾನದ ಕೊಡುಗೆಯ ಬಟ್ಟಲು

ಜಗದ ಸಿರಿವಂತ ಸಂಸ್ಕೃತಿಯ ಕಣಜ

ಜನಿಸಿದ ಎಲ್ಲರ ಪುಣ್ಯಧಾಮ..

ಭರತ ತಾಯ ಮಡಿಲಲಿ ಜನನವೆ

ಪ್ರತಿ ಭಾರತೀಯನ ಹೆಮ್ಮೆ

ಉಸಿರಿನ ಪ್ರತಿ ಘಳಿಗೆ ಮುಡಿಪಾಗಿಡು

ದೇಶ ಗಟ್ಟಿಗೊಳಿಸಲು, ಪ್ರಕಾಶಿಸಲು..

ಭರತ ತಾಯಿ ನೆಲದಲಿ ಜನ್ಮವು

ಸಾವಿರ ಜನ್ಮಕು ತೀರದ ಋಣವು

ದಿವ್ಯ ನಾಡಿನ ದಾರ್ಶನಿಕರ ವಚನದಲಿ

ಪುಣ್ಯ ಪುರುಷರ ಜ್ಞಾನ ಸೆಲೆಯಲಿ

ಜಳಪಿಸುವ ಶಕ್ತಿಯಲಿ ನೀ ಬೆಳಗು..

ಭಾರತೀಯತೆಯ ಉಸಿರು ಜೀವಸೆಲೆಯಾಗಿರಲು

ಭಾರತೀಯನೆಂದು ಹೆಮ್ಮೆಯಿಂದ ಬೀಗು

ನಿನ್ನೆದೆಯ ಪ್ರತಿ ಬಡಿತದಲ್ಲು

ಭಾರತೀಯನೆಂಬ ಸದ್ದಿನ ದನಿ ಕೇಳು

ಪುಣ್ಯನಾಡನು ಆರಾಧಿಸು..ಪ್ರೀತಿಸು..

ರಾಮಚಂದ್ರ ಸಾಗರ್

ಪ್ರೇಮದ ಕಡಲು..

ನಿನ್ನ ಕಣ್ಣೋಟದಿಂದಲೇ ಒಲವು ಉಕ್ಕುತಿರಲು

ನೀನಲ್ಲವೇ ಗೆಳತಿ ಸಿಹಿ ಪ್ರೇಮದಾ ಕಡಲು..

ನಿನ್ನ ನಗುಮೊಗದಿಂದಲೇ ಸ್ವರ್ಗವು ಬಾಳಾಗಿರಲು

ನೀನಲ್ಲವೇ ಗೆಳತಿ ಹರುಷದಾ ಸರೋವರವು..

ನಿನ್ನ ಸತ್ಕಾರದ ಸೌಜನ್ಯವೇ ಸಿರಿಯೆನಿಸಿರಲು

ನೀನಲ್ಲವೇ ಚೆಲುವೆ ಬಾಳಿನಾ ಆದರವು..

ನಿನ್ನ ಕೈಸೆರೆಯಿಂದಲೇ ಸಂಭ್ರಮವು ಜೊತೆಯಾಗಿರಲು

ನೀನಲ್ಲವೇ ಕೋಮಲೆ ಸಂತಸದ ಹಾದಿಯು..

ನಿನ್ನ ನುಡಿಯಿಂದಲೇ ಹೃದಯವು ನಲಿಯುತಿರಲು

ನೀನಲ್ಲವೇ ನಲ್ಲೆ ಅಭಯದ ರಕ್ಷೆಯು..

ನಿನ್ನ ನಡೆಯಿಂದಲೇ ಸದ್ಗುಣಗಳು ಸಂಭವಿಸುತಿರಲು

ನೀನಲ್ಲವೇ ಸಂಭಾವಿತೆ ಸಭ್ಯತೆಯ ಹೊನಲು..

ನಿನ್ನ ಪ್ರೀತಿಯ ಬಲದಿಂದಲೇ ಸುಯೋಗವು ಒಲಿದಿರಲು

ನೀನಲ್ಲವೇ ಬೆಡಗಿ ಬಾಳಿಗೆ ಭಾಗ್ಯದ ಬಂಧನವು..

ರಚನೆ: ರಾಮಚಂದ್ರ ಸಾಗರ್

ನೀನೆನ್ನುವ ನೆನಪು....

ಮುಂಜಾನೆಯ ತಂಗಾಳಿಯ ಹಾದಿಯಲಿ

ಕಾಡುತಿದೆ ಗೆಳೆಯಾ ನೀನೆನ್ನುವ ಅನುಪಮ ನೆನಪು..

ನಗುವ ಮಲ್ಲಿಗೆಯ ಮೋಹದ ಚೆಲುವಿನಲಿ

ಅರಳುತಿದೆ ಗೆಳೆಯಾ ನೀನೆನ್ನುವ ನಿಸ್ವಾರ್ಥದ ನೆನಪು..

ಸಂಪಿಗೆಯ ಸೌರಭದ ಕಂಪಿನಲೆಯಲಿ

ಘಮಿಸುತಿದೆ ಗೆಳೆಯಾ ನೀನೆನ್ನುವ ಸವಿಧಾರೆಯ ನೆನಪು..

ಮಂಜಿನ ಹನಿಗಳ ಶ್ವೇತ ಮಾಲೆಯಲಿ

ಮೂಡುತಿದೆ ಗೆಳೆಯಾ ನೀನೆನ್ನುವ ನಿರ್ಮಲ ನೆನಪು.. 

ರವಿ ಕಿರಣಗಳ ಕಾಂತಿಯ ಮೇಳದಲಿ

ಶೋಭಿಸುತಿದೆ ಗೆಳೆಯಾ ನೀನೆನ್ನುವ ಸೋಜಿಗದ ನೆನಪು..

ಒಲವು ತುಂಬಿದ ನನ್ನಯಾ ಕಾತರದ ಕಣ್ಣುಗಳಲಿ

ಸದಾ ಬೇಡಿದೆ ಗೆಳೆಯಾ ನೀನೆನ್ನುವ ಪ್ರೀತಿಯ ನೆನಪು..

ಬೆಡಗು ತುಂಬಿದ ಕೋಮಲ ನಡಿಗೆಯಲಿ

ನಿನ್ನದೇ ಸಾನಿಧ್ಯವೆ ಜೊತೆಯಾದ ನವಿರಾದ ನೆನಪು...

ರಚನೆ: ರಾಮಚಂದ್ರ ಸಾಗರ್

ಚಿತ್ರ: ಶಿಲ್ಪಾ ರಾಜನ್

ನಮ್ಮೊಲವಿನ ರಂಗು

ನೋಡು ಬಾ ಒಲವಿನ ಗೆಳೆಯನೇ

ಬಾನಲ್ಲಿ ಮೂಡಿದೆ ನಮ್ಮೊಲವ ರಂಗಿನ ಚಿತ್ತಾರ

ಇರಬಹುದೇನು ಹುಡುಗನೆ ಇದುವೇ

ನಮ್ಮೊಲವಿಗೆ ಮೋಹದ ಭವ್ಯತೆಯ ಸಿಂಗಾರ...

ಪ್ರೀತಿಯ ಮಧುರ ಹಾದಿಯಲ್ಲಿ ಇದುವೇ

ವೈಭವದ ಘಳಿಗೆಯಲ್ಲವೆ ಈ ಬಾಳಿಗೆ

ಹರುಷದ ಲೋಕದಲ್ಲಿ ಸಂಭ್ರಮಿಸುವುದೇ

ನಮ್ಮೊಲವಿಗೆ ಇಂದು ಉಡುಗೊರೆಯಲ್ಲವೇ?

ರಮ್ಯತೆಯ ರಂಗಿನಲ್ಲಿ ಕಟ್ಟೋಣವೇ

ಬಣ್ಣ ಬಣ್ಣದ ಸಡಗರದ ಬದುಕನು

ರಂಗೇರಿದ ಮಾತಿನಲ್ಲಿ ನೀಡೋಣವೇ

ಬಾಳಿಗೆ ಅಭಯದಾ ಮಾತನು...

ಹರುಷದ ನಾವೆಯಲ್ಲಿ ನಲಿಯೋಣವೇ

ಕಾಡುವ ಕನಸಿಗೆ ಉತ್ತರಿಸೋಣವೇ..?

ರಮಿಸುವ ತಂಗಾಳಿಯ ಪ್ರೀತಿಯಲೆಯಲಿ

ಅನುರಾಗದ ಗೀತೆಗೆ ದನಿಯಾಗೋಣವೇ..?

ಪ್ರೇಮದ ಯಾತ್ರೆಯಲ್ಲಿ ಜೊತೆಯಾದರೆ

ಅದುವೇ ಗೆಳೆಯಾ ಈ ಬಾಳಿಗೆ ಶ್ರೀರಕ್ಷೆಯು

ಪ್ರೇರಣೆಯ ಪ್ರೀತಿಯಲಿ ಒಂದಾದರೇ

ಅದುವೇ ಹೃದಯಕೆ ಒಲವಿನ ಚಿತ್ತಾರವು..

ಹಗಲಿರುಳು ಕಾಡಿದ ಬಣ್ಣದ ಕನಸಿಗೆ

ಉತ್ತರವೇ ಮಮತೆಯ ಬಂಧನವು

ಪ್ರೇಮದ ಈ ಹಾದಿಯಲಿ ಸಾಗುವುದೇ

ಈ ಬಾಳಿಗೆ ಆ ದೇವನ ವರವು..

ನೋಡು ಬಾ ಒಲವಿನ ಗೆಳೆಯನೇ

ಬಾನಲ್ಲಿ ಮೂಡಿದೆ ನಮ್ಮೊಲವ ರಂಗಿನ ಚಿತ್ತಾರವು

ಜೊತೆಯಾಗಿ ಉತ್ತರಿಸೋಣ ಬಾರೋ

ನನ್ನೊಲವಿನ ಸೌಜನ್ಯದ ಸರದಾರನೇ..!

ರಚನೆ: ರಾಮಚಂದ್ರ ಸಾಗರ್

ಚಿತ್ರ: ಸಂಭ್ರಮ ಶ್ರೀ