ಸ್ವಾಗತಿಸೋಣ ಬಾ ಗೆಳತಿ..

(ಹೊಸ ಬಾಳಿಗೆ ಪ್ರೀತಿಯಿಂದ ಹೆಜ್ಜೆಯನಿಡಿತ್ತಿರುವ ಮಹೇಶ್ ಮತ್ತು ಪ್ರಿಯಾ  ಇವರಿಗೆ ಮದುವೆಯ ಮಮತೆಯ ಶುಭಾಶಯಗಳು..)

ಗೆಳತಿ..

ಪ್ರೇಮದ ಕಡಲಿನ ಅನುರಾಗದ ಅಲೆಯು

ನಮ್ಮೆಡೆಗೆ ಬೀಸುತಿದೆ ನಿಜವಲ್ಲವೇ ಗೆಳತಿ...?

ಹರುಷದ ಬಾಳಿನ ವೈಭವದ ಯಾತ್ರೆಯು

ಹೂತುಂಬಿ ಕರೆಯುತಿದೆ ಸಾಗೋಣವೇ ಗೆಳತಿ..

ಸಂಭ್ರಮದ ಪ್ರೀತಿಯು ಕುಸುಮವಾಗಿರಲು

ಮಧುರ ಮನಗಳಲಿ ನಲಿಯೋಣವೇ ಗೆಳತಿ..

ಸಾವಿರ ವರುಷಕೂ ನಮ್ಮೊಲವು ಗಂಧವಾಗಿರಲು

ಸೌಗಂಧದ ಮೋಹದಲಿ ಬಾಳೋಣವೇ ಗೆಳತಿ..

ಮುಸ್ಸಂಜೆಯ ರಂಗು ಒಲವಿನ ರಥವಾಗಿರಲು

ನಗುತ ರಥವೇರಲು ಒಂದಾಗೊಣವೇ ಬಾ ಗೆಳತಿ..

ಘಮಿಸುವ ಮಲ್ಲಿಗೆಯ ತೋಟದ ಹಾದಿಯಲಿ

ನೀ ಬಿನ್ನಾಣದ ಕೋಮಲೆಯಾಗಲು ಬಾ ಗೆಳತಿ..

ಸವಿನೋಟದ ಆಲಾಪವೇ ಬಾಳಿಗೆ ಅಮೃತವಾಗಿರಲು

ಸಿಹಿಜೇನಿನ ನೌಕೆಯಲಿ ನಾವಿಕಳಾಗಲು ಬಾ ಗೆಳತಿ..

ಪ್ರೀತಿಯ ಮಾಲೆಗೆ ಮನಸುಗಳು ಬೇಡುತಿರಲು

ಒಲವ ಮಂದಿರದಲಿ ಹೊಸ ಬಾಳಿಗೆ ಸ್ವಾಗತಿಸೋಣ ಬಾ ಗೆಳತಿ..

ರಚನೆ: ರಾಮಚಂದ್ರ ಸಾಗರ್

ಚಿತ್ರ: ಅಶೋಕ್ ಕಾರ್ಕೆರ

ಮುಳ್ಳು ಹೂವಾಗುವುದು...

ಮುಳ್ಳೇ ಹಾದಿಯಾದರೇನು ನೋವೇ ಜಗವಾದರೇನು 

ನಿನ್ನಾಸರೆಯು ಹೂವಂತೆ ಎನುವೆ ಅಮ್ಮ ನಾನು..

ನಿನ್ನ ವಾತ್ಸಲ್ಯವೇ ಬಾಳಿಗೆ ಶ್ರೀರಕ್ಷೆಯು ಇದುವೇ ಸತ್ಯವು

ನನ್ನ ಉಸಿರೇ ಬೇಡುವುದು ನಿನ್ನ ಜೊತೆಯನೇ ನಿತ್ಯವು..

ನೀನಿರಲು ಬಾಳು ಮರೆಯುವುದು ನೂರೊಂದು ನೋವು

ನಡೆವ ದಾರಿಯಲ್ಲಿ ದಣಿವೆನಿಸದು ಮನಕೆ ಅರೆಕ್ಷಣವು..

ದುಃಖದ ಬಿರುಮಳೆಯಲ್ಲು ನಗುವುದನೇ ಕಲಿಯುವೆನು

ಸುಖದ ಗಿರಿಗೆ ಏರುವುದನು ಗುರಿಯಾಗಿಸುವೆನು ದಿನವು..

ಸೋಲೆ ಅಲೆಯಾದರೇನು ದುಗುಡವೆ ಮನೆಯಾದರೇನು

ಸೋಗೆಯರಳಿ ಜಯವು ಲಭಿಸದೇ ಉಳಿಯುವುದೇನು...

ಮಮತೆಯ ಅನುಜಾತೆಯು ಆನಂದದಿ ಬಾಳಲಿ

ಮಮಕಾರವೇ ನಿನ್ನಿಂದಲೇ ನಮಗಾಮೃತವಾಗಲಿ...

ದುಮ್ಮಾನವು ದೂರಾಗುವುದು ಆತಂಕವು ಆರುವುದು

ಸುಮ್ಮಾನವು ನನಸಾಗಿ ಬಾಳಿನೊಳು ಸುರಿಯುವುದು....

ನೀನಿಡುವ ಹೆಜ್ಜೆಗೆ ನೋವಿಗೇ ಸೋಲಾಗುವುದು

ನಾನಿರಲು ಜೊತೆಯಲಿ ಜಾರದಿರಲಿ ಹನಿ ಕಣ್ಣೀರು...

ನೀನಿರಲು ಬಾಳು ಕಾಣುವುದು ನೂರೊಂದು ಕನಸು

ಆ ಸಂಭ್ರಮದ ದಿನಗಳೆಡೆಗೆ ಸಾಗೋಣ ಮರೆಯುತಾ ನೋವು..

ಬಾಡಿದ ಮೊಗದಲ್ಲಿ ನಗುವುದು ನಲಿದಾಡುವುದು

ನಿನ್ನ ಮಮತೆಯ ಹಾರೈಕೆಯು ಸಿದ್ಧಿಸುವುದು ದಿಟವು..

ಛಲದ ನಡಿಗೆಯು ಗೆಲ್ಲುವುದು ನೀ ನೋಡುತಿರು

ಪಣದ ಯಾತ್ರೆಯಲಿ ಮುಳ್ಳು ಹೂವಾಗುವುದು ನೀ ಮರೆಯದಿರು..

ರಚನೆ: ರಾಮಚಂದ್ರ ಸಾಗರ್

“ಹೊಸ ವರುಷ”

 

ಎಲ್ಲರಿಗೂ  2025 ನೇ ಹೊಸ ವರ್ಷದ ಶುಭಾಶಯಗಳು. ಎಲ್ಲರಿಗೂ ಈ ಹೊಸತರ ಸಂಚಾರದಲ್ಲಿ ಹೊಸತನ ಮೂಡಲಿ. 2024 ರಲ್ಲಿ ಕಾಡಿದ ಕಹಿ ಘಳಿಗೆಗಳು ಮರೆಯಾಗಲಿ. ಬರುವ ದಿನಗಳು ಸಂತಸವನ್ನು ಅಲೆಯಾಗಿಸಲಿ ಎಂದು ಆಶಿಸುತ್ತೇನೆ. ಎಲ್ಲರ ಪ್ರೀತಿ, ಸ್ನೇಹ, ಮಮತೆಯಿಂದ ಎಲ್ಲರೊಳಗೊಂದಾಗಿ ಬದುಕುವುದೇ ಜೀವನವೆನ್ನುತ್ತಾ ಎಲ್ಲರ ಹಾರೈಕೆಯನ್ನು ಈ ಸಮಯದಲ್ಲಿ ಬಯಸುತ್ತೇನೆ ಬಂಧುಗಳೇ..

"ಪ್ರೀತಿ ಬೇಡುವ ಸ್ನೇಹದ ಹೃದಯದಲಿ

ಒಲವ ಸಾಗರವೆ ನಿಮ್ಮ ಸ್ನೇಹವು

ನೋವು ಜೊತೆಯಾದ ಕಹಿ ದಿನಗಳಲಿ

ಸಂತೋಷದ ಹಿತಧಾರೆಯೆ ನಿಮ್ಮ ಸ್ನೇಹವು"

ಈ ಕ್ಷಣದಲ್ಲಿ ಹೊಸ ವರ್ಷ ಕವಿತೆಯನ್ನು ಪುನಃ ಪೋಸ್ಟ್ ಮಾಡುತ್ತಿರುವೆ..ನಿಮಗಾಗಿ, ನಿಮ್ಮೆಲ್ಲರ ಅಕ್ಕರೆಯ ಸ್ನೇಹದ ಪ್ರತೀಕವಾಗಿ..

“ಹೊಸ ವರುಷ”

ಹೊಸ ವರುಷವೆ ನೀ ಬೆಳಕಾಗು

ರೋಧನೆಯಿಲ್ಲದ ಜಗವಾಗು..

ಜ್ಞಾನ ದೀವಟಿಯು ನಿತ್ಯ ಬೆಳಗುತಿರಲಿ

ಸಂತಸದ ಹೊನಲು ನಿತ್ಯ ತುಂಬಿರಲಿ

ಎಲ್ಲರ ಮನಸು ಸದಾ ನಗುತಿರಲಿ

ಎಲ್ಲರ ಬದುಕು ಸದಾ ಪಳಿಸುತಿರಲಿ...

ಯಶಸ್ಸಿನ ಫಲವು ಸದಾ ಒಲಿಯಲಿ

ಜಗದ ಚೆಲುವು ಸದಾ ಸಂಭ್ರಮಿಸಲಿ

ಎಲ್ಲರ ಮೊಗದಲಿ ನಿತ್ಯ ನಗುವಿರಲಿ

ಸಹೋದರ ಬಂಧುಗಳಲಿ ನಿತ್ಯ ಹಿತವಿರಲಿ...

ಪ್ರಕೃತಿಯ ಮುನಿಸು ಕಾಡದಿರಲಿ

ಮಳೆ ಬೆಳೆಯು ಚಿನ್ನವಾಗಲಿ

ಜಗದ ಜೀವಗಳು ಸೊರಗದಿರಲಿ

ಸಂತುಷ್ಟಿಯ ಹಿತವು ಮೇಳೈಸುತಿರಲಿ...

ಕ್ಷಾಮ ರೋಗಗಳು ಬಾರದಿರಲಿ

ಕಹಿಯ ಸತ್ವವು ನುಸುಳದಿರಲಿ

ನಾಡಿನ ನಾಯಕರು ಸೇವಕರಾಗಿರಲಿ

ನಾಡಿನ ಜನರು ನಗುತಿರಲಿ...

ರಚನೆ: ರಾಮಚಂದ್ರ ಸಾಗರ್

ಹೃದಯ ಹಿಂಡದೇನು?

 

ಎಲ್ಲರಿಗೂ ನಮಸ್ಕಾರ..

ಆತ್ಮೀಯರೇ, 2020ನೇ ವರ್ಷ ಹಲವು ದುಗುಡಗಳಿಂದಲೇ ಸಮಯವನ್ನು ಮರೆಯಾಗಿಸಿದೆ. ನೋವೇ ಆವರಿಸಿಕೊಂಡು ಇಡೀ ಜಗವು ನರಳಿತು.. ಅನೇಕ ಬಡ ಕುಟುಂಬಗಳು ಅನುಭವಿಸಿದ ಯಾತನೆ ಪದಗಳಿಂದ ಹೇಳುವುದು ಕಷ್ಟವೇ! ನೋವು ನುಂಗದ ಜೀವಿಯಿಲ್ಲ ಎನ್ನುವಂತೆ ಮಾಡಿದ್ದು ಈ 2020 ನೇ ವರ್ಷ.

ನೋವಿನ ನಡುವೆಯೂ ನಮ್ಮ ಕಾರ್ಯದಲ್ಲಿ ಸಾಧ್ಯವೆನಿಸಿದ್ದನ್ನು ಸಾಧಿಸಿದ್ದೇವೆ. ಅನ್ನಕ್ಕಾಗಿ ಕೈಲಾಗಿದ್ದು ದುಡಿದಿದ್ದೇವೆ. ಎಲ್ಲರ ನೋವಿನೊಂದಿಗೆ ಆಗದಿದ್ದರೂ ಕೈಲಾದ ಒಂದೆರಡು ಜನರಿಗೆ ಸ್ಪಂದಿಸಿದ ನೆಮ್ಮದಿಯಂತೂ ಇದೆ..

ಹೊರ ಜಗತ್ತು ದುಗುಡ, ತಲ್ಲಣ, ರೋದನೆ ಮಳೆ ಸುರಿಸಿತು. ಮನದೊಳಗಿನ ಜಗತ್ತು ಆ ನೋವಿನ ಅಲೆಯಿಂದ ಮೂಕವಾಗಿಯೇ ಉಳಿವುದಾಯಿತು! ಕಾಣದ ವೈರಸ್ ಇಡೀ ಜಗವನ್ನು ಬೆಂಡಾಗಿಸಿ ಮನುಕುಲಕ್ಕೆ ಸಂಕಷ್ಟ ತಂದೊಡ್ಡಿದ ಸಮಯದಲ್ಲೂ ನಮ್ಮೊಳಗಿನ ದ್ವೇಷ, ಅಸೂಯೆ, ಹಿಂಸೆ, ದುರಾಸೆಗಳು ಹಾಗೇ ಉಳಿದಿದ್ದು ವಿಪರ್ಯಾಸ! ಈ ಸಮಯದಲ್ಲೂ ಒಂದೆನ್ನುವ ಭಾವ ಮೂಡಲಿಲ್ಲ..ಇನ್ನು ಮುಂದೆಯೂ ಅದು ಅಸಂಭವವೇ!

ಈ ಸಮಯದಲ್ಲೂ ಮನದಲ್ಲಿ ಬೇಸರವಿದ್ದರೂ ತೋಚಿದ್ದಂತೂ ಬರೆದಿದ್ದೇನೆ.. ಬರವಣಿಗೆ ನಿಲ್ಲಬಾರದು ಎನ್ನುವ ಉದ್ದೇಶದಿಂದ.. ಎಲ್ಲರೂ ನನ್ನ ಬರಹಗಳನ್ನು ಓದಿ ಅಕ್ಕರೆಯಿಂದ ಹಾರೈಸಿದ್ದೀರಿ..ಎಲ್ಲರಿಗೂ ವಂದನೆಗಳು..

ಈಗ  “ಹೃದಯ ಹಿಂಡದೇನು?” ಎನ್ನುವ ಕವಿತೆಯೊಂದಿಗೆ ಈ ವರ್ಷಕ್ಕೆ ವಿದಾಯ ಹೇಳುತ್ತಿದ್ದೇನೆ..ಇದು ಜೀವನದಲ್ಲಿ ಕಂಡ ಹಲವು ವೈರುದ್ಯಗಳ ಪಟ್ಟಿಯಾಗಿದೆ. ಅದರಲ್ಲಿ ಕೆಲವೊಂದು ಆಯ್ದುಕೊಂಡಿದ್ದು ಬರೆದಿದ್ದೇನೆ. ಇದು ನಿಮ್ಮ ಮನದ ಮಾತು ಆಗಿರಲೂಬಹುದು..

ಇದು ಈ 2020 ವರ್ಷದ ನನ್ನ ಕೊನೆಯ ಕವಿತೆ..

ದಯವಿಟ್ಟು ಕವಿತೆ ಓದಿ ಹಾರೈಸಿ.. ಮತ್ತೆ ಮುಂದಿನ ವರ್ಷವೇ ಅಂದರೆ 2021ರಲ್ಲಿ ಹೊಸ ಕವಿತೆ ರಚಿಸುತ್ತೇನೆ..

ಎಲ್ಲರಿಗೂ ಮತ್ತೊಮ್ಮೆ ತಮ್ಮ ಅಭಿಮಾನದ ಸಹಕಾರಕ್ಕೆ ವಂದನೆಗಳು..

ಹೃದಯ ಹಿಂಡದೇನು?

ಕಳ್ಳನನು ರಕ್ಷಕನೆಂದು ಹಾಡಿ ಹೊಗಳುವುದೇಕೆ

ಸುಳ್ಳನನು ಸತ್ಯವಂತನೆಂದು ಗುಣಗಾನಿಸುವುದೇಕೆ

ಕಪಟಿಯ ಬೂಟಾಟಿಕೆಯ ಸುಯೋಗವೆನುವುದೇಕೆ

ಕಕವನ ಆಷಾಢಭೂತಿಗೂ ಮರುಳಾಗುವುದೇಕೆ?

ದರೋಡೆಕೋರನ ದಾನಿಯೆಂದು ಪೂಜಿಸುವುದೇಕೆ

ಕರೋಟವಿಲ್ಲದ ಸಾಹಿತ್ಯವನು ಜ್ಞಾನಸಾಗರವೆನುವುದೇಕೆ

ದೋಷದ ದುರ್ವ್ಯಸನಿಯ ಸಚ್ಚರಿತನೆನುವುದೇಕೆ

ಮೋಸದ ದುಷ್ಟನ ಕುಣಿತಕೆ ಬೆರಗಾಗುವುದೇಕೆ?

ಮಂಜು ತುಂಬಿದ ಹಾದಿ ಶುಭ್ರವೆನುವುದೇಕೆ

ಮಂಕು ಮಾತನು ಅಪ್ಪಿ ಸಂಭ್ರಮಿಸುವುದೇಕೆ

ಪುಣ್ಯದ ಮನುಜನ ಅಪವಿತ್ರನೆನುವುದೇಕೆ

ಧನ್ಯದ ನದಿಗೆ ಕೊಳಚೆ ಚೆಲ್ಲುವುದೇಕೆ?

ಹುಸಿ ಸೊಲ್ಲನು ಸತ್ಯಸಾರವೆನುವುದೇಕೆ

ಮುಸಿ ಜನರನು ಪಾವನರೆನುವುದೇಕೆ

ಸೈಂಧವವ ಸಿಹಿಯೆಂದು ನಟಿಸುವುದೇಕೆ

ಸೈದ್ದಾಂತ ಅಹಿತವಾದರೂ ಜೈಯೆನುವುದೇಕೆ?

ಅಜ್ಞಾನಿಗೆ ಪಾಂಡಿತ್ಯನೆಂದು ಹಾರ ಹಾಕುವುದೇಕೆ

ಸುಜ್ಞಾನಿಗೆ ಗಾಂಪರನೆಂದು ಒದೆಯುವುದೇಕೆ

ಮೂರ್ಖನಿಗೆ ಮಹೋದಯನೆಂದು ಮೆರವಣಿಗೆಯೇಕೆ

ಮೂರ್ಖನಾದಕೆ ಬೆಪ್ಪಾಗಿ ಕುಣಿಯುವುದೇಕೆ?

ನಂಜು ಮನವನು ನಿರ್ಮಲವೆನುವುದೇಕೆ

ನಂಬಿಕೆ ಕೊಂದ ದ್ರೋಹಿಗಳಲಿ ವಿಶ್ವಾಸಿಸುವುದೇಕೆ

ಅನಂಗನ ಸರ್ವಾಂಗಿಯೆನುತ ಭಜಿಸುವುದೇಕೆ

ಅನಂತದ ಸತ್ಯಕೆ ಸಾವಿದೆ ಎನ್ನುವುದೇಕೆ...?

ಸತ್ಯದ ಜಗವನು ಮೆಚ್ಚದೆ ನಿತ್ಯ ಸಾಯುವುದೇಕೆ

ಮಿಥ್ಯದ ಲೋಕವನು ಅಪ್ಪಿ ಓದ್ದಾಡುವುದೇಕೆ

ಮುಖವಾಡದ ಬದುಕು ಎಷ್ಟು ಹಿತವು?

ಮುಖಮುದ್ರೆ ಬದಲಾಗಿ ಹೃದಯ ಹಿಂಡದೇನು?

ರಚನೆ: ರಾಮಚಂದ್ರ ಸಾಗರ್