ಕ..ಕಾಗುಣಿತದಲಿ ಒಲವಿನ ಸೆಲೆ ಅಲೆಯಾಗಿ ಕಂಗೊಳಿಸಿದಾಗ, ಒಲವು ನದಿಯಾಗಿ ಹರಿದಾಗ..
ನೀನೆ ಗೆಳತಿ..
ಕಪ್ಪಿರುಳು ಹಾದಿಯಲಿ ಬೆಳಕಾಗಿ ಬಂದವಳು
ಕಾನನದ ಕಂದರದಲಿ ಕೈಹಿಡಿದು ನಡೆಸಿದವಳು
ಕಿರುಕುಳದ ಮನದಲಿ ಸವಿಜೇನು ತುಂಬಿದವಳು
ಕೀಳುದೆಸೆಯ ಬದುಕಲಿ ಚೈತನ್ಯಧಾರೆಯಾದವಳು
ಕುಸುಮಿತ ಒಲವ ಬನದಲಿ ಸ್ವಾಗತಿಸಿ ನಕ್ಕವಳು
ಕೂಗಿಡುವ ಹೃದಯದಲಿ ರಮಿಸುವ ಸುರಕನ್ನೆಯಾದವಳು
ಕೃಪೆತೋರುವ ನಯನದಲಿ ಒಲವಿಗೆ ಆಸರೆಯಾದವಳು
ಕೆರಳಿಸು ಕನಸಲಿ ಸಿಹಿಧಾರೆಯಾದವಳು
ಕೇದಿಗೆಯ ಹೂ ಘಮಲಿನಲಿ ಮನ ಸೌರಭಿಸುವವಳು
ಕೈವಲ್ಯದ ಬದುಕಲಿ ಮೋಹದ ಮಳೆಯಾದವಳು
ಕೊನರುವ ಪ್ರೀತಿಗೆ ಆಸರೆಯ ಆಗಸವಾದವಳು
ಕೋಮಲ ಗಾನದಲಿ ಪ್ರೇಮದ ಕಡಲಾದವಳು
ಕೌಟಿಲ್ಯದ ಜಗದಲಿ ನಿರ್ಭೀತಿಯ ನಿನದ ಮೊಳಗಿಸಿದವಳು
ಕಮ್ಮಟದ ನಡುಮನೆಯಲಿ ಅಭಯದ ಉತ್ಪನ್ನವಾದವಳು
ಕಹಳೆಯ ಸದ್ದಿನಲಿ ಆಹ್ಲಾದದ ಬಾಳ್ವೆಗೆ ಕರೆಯೋಲೆಯಾದವಳು
ಕಮನೀಯ ಹೃದಯಲಿ ಮನ ಬೆಸೆದ ಚೆಲುವೆಯು ನೀನು
ಕಾಠಿಣ್ಯದ ಬದುಕನು ಹೂವಾಗಿಸಿದ ಪಾರಂಗತೆಯು
ಕಿನಾರೆಯ ಹೂಬನದಲಿ ಸೊಗಸು ಚೆಲ್ಲಿದವಳು
ಕೀರ್ತಿಸುವ ಒಲವಿಗೆ ಸುಜಲವಾಗಿ ಹರಿದವಳು
ಕುಶಲದ ಬಾಳ ನದಿಯನು
ಮೈದುಂಬಿದವಳು ನೀನೆ ಗೆಳತಿ
ರಾಮಚಂದ್ರ ಸಾಗರ್
ಸಜ್ಜನಿಕೆಯ ನಿನ್ನ ನಗುವಿನಲೆಯೆ ಬಾಳಿಗೆ ವರದಾನವು
ಸೌಮ್ಯದ ನಿನ್ನ ಕುಡಿನೋಟವೆ ಮನಕೆ ಸವಿಜೇನು
ಸತ್ಕಾರದ ನಿನ್ನ ಒಲವಿನೋಲೆಯೆ ಆದರದ ಸಂಕೀರ್ತನೆಯು
ಸಂಪನ್ನೆ ನಿನ್ನ ಸಾಂಗತ್ಯವೆ ಒಲವ ಸಂಕಲ್ಪವು
ಸಂಭಾವಿತೆ ನಿನ್ನ ಹಿತನುಡಿಯೆ ಬಾಳಸಾರವು
ಸಾಮ್ಯಾಜ್ಞಿ ನಿನ್ನ ಕೈಸೆರೆಯೆ ಸುಖಸಾಗರವು
ಸಾಕಾರವೆ ನಿನ್ನೊಲುಮೆಯ ಛಲವು ನನ್ನೊಳು
ಸಾಕ್ಷಾತ್ಕಾರವೆ ನಿನ್ನ ಸಂಸ್ಕಾರದ ಸಿಂಚನವು
ಸಾರ್ವಭೌಮವೆ ನಿನ್ನ ಸಾನಿಧ್ಯದಲಿ ರಮ್ಯತೆಯ ಬಾಳು
ಸೌಭಾಗ್ಯವೆ ನೀ ಹೃದಯ ಬೆಸೆದ ಘಳಿಯು
ಸೌಷ್ಠವವೆ ನಿನ್ನ ಶೋಭಿಸುವ ಮನಸು
ಸೌಗಂಧವೆ ನೀನರಳಿಸಿದ ಪ್ರೇಮ ಕುಸುಮದ ಘಮಲು
ಸಂವೇದನೆಯೆ ನೀ ಕೈತೋರಿದ ಪರಿಷ್ಕರಣದ ಬದುಕು
ಸಂಪ್ರೀತಿಯೆ ನೀ ಮನಕೆ ಮುಡಿಸಿದ ಮಲ್ಲಿಗೆಯು
ಸಂಯೋಗವೆ ನೀ ನನ್ನನು ಒಪ್ಪಿದ ಕ್ಷಣವು
ಸಮ್ಮೋಹನವೆ ನೀ ನನ್ನವಳೆನ್ನುವ ಮನದ ನುಡಿಯು
ಸಮ್ಮಿಳಿತವೆ ನಿನ್ನ ಪ್ರೀತಿ ತುಂಬಿದ ಸ್ನೇಹವು
ಸಮ್ಮೋದವೆ ನೀ ನೀಡುವ ಕೈತುತ್ತು
ಸೌಖ್ಯದ ಶರಧಿಯೆ ನೀ ಜೊತೆಯಾದ ಬಾಳು
ಸೌಂದರ್ಯದ ಆಸ್ಥಾನವೆ ನಿನ್ನ ನಗುವ ಮೊಗವು
ರಾಮಚಂದ್ರ ಸಾಗರ್
ಸತ್ಯದ ಸತ್ವವು ಜಗದಲಿ ಸಂಪನ್ನವಾಗಲಿ
ಸಾಫಲ್ಯತೆಯ ದೀಪವು ಎಲ್ಲರೆದೆಯಲಿ ಬೆಳಗಲಿ
ಸಿರಿತನವು ನಿಸ್ವಾರ್ಥತೆಯಲಿ ವಿಜೃಂಭಿಸಲಿ
ಸೀಜೇನಂತೆ ಸತ್ಯಸಾರವು ಪ್ರಿಯವಾಗಲಿ
ಸುಜರ ಸೌಮ್ಯದ ಬೀಡು ಉದಯವಾಗಲಿ
ಸೂಸುತಿರಲಿ ಸೌಜನ್ಯದ ಕಂಪು ಜಗದಲಿ
ಸೃಜನೆಯಾಗುತಿರಲಿ ನಿತ್ಯ ಸೌಹಾರ್ದದ ಆಶಾಕಿರಣ
ಸೆಣೆಸುತಿರು ನಿತ್ಯ ಶಾಂತಿಧಾಮದ ರಕ್ಷಣೆಯಲಿ
ಸೇಡು ದಳ್ಳುರಿಯು ಜಗದಿಂದ ಕೊನೆಯಾಗಲಿ
ಸೈರಣೆ ಸಹನೆಯು ಮನಗಳ ಉಸಿರಾಗಲಿ
ಸೊರಗಿಲ್ಲದ ಬಾಂಧವ್ಯವು ನಮ್ಮದಾಗಲಿ
ಸೋಲಿರದ ಹಾದಿಯು ಎಲ್ಲರದಾಗಲಿ
ಸೌಖ್ಯದ ಸೌಧದಾಸೆರೆಯು ಜಗವಾಗಲಿ
ಸಂತಸ ಸಡಗರವು ಸರ್ವರಿಗು ಜೊತೆಯಾಗಲಿ
ಸಹೃದಯಗಳ ಸ್ನೇಹವೆ ಕಡಲಾಗಲಿ
ಸಚ್ಚರಿತ ಸದ್ಗತಿಯ ಅಲೆಯು ನಿತ್ಯ ಬೀಸುತಿರಲಿ
ಸಿದ್ಧಾಂತವು ನೊಂದವರ ದನಿಯ ಉಸಿರಾಗಲಿ
ಸೀಳುದಾರಿಯಲಿ ಸಿಲುಕಿದವರು ಹೂಪಥದಲಿ ನಲಿದಾಡಲಿ
ಸುಭಗದ ಇಳೆಯಲಿ ದೀನತೆಯು ಕ್ಷಯವಾಗಲಿ
ಸೂತ್ರ ಕೃತಿಗಳು ದಯೆತುಂಬಿದ ಹೊನಲಾಗಲಿ
ರಾಮಚಂದ್ರ ಸಾಗರ್
(ಕಾಗುಣಿತದ ಶೈಲಿಯಲಿ ...ಸ.ಸಾ.ಸಿ. ಸೀ...ಹೀಗೆ ಮನದ ಭಾವನೆಗಳು ಪದಗಳಾಗಿ ಪುಟಿದಾಗ ಅರಳಿದ ಕವಿತೆ. ಓದಿ ಹಾರೈಸಿ..)
ಸಜೆಯಾಗಿದೆ ಗೆಳತಿ ನೀ ಕಾಣದೆ ಈ ಘಳಿಗೆಯಲಿ
ಸಾವಧಾನವೆಲ್ಲಿದೆ ಗೆಳತಿ ನೀ ಬಾರದೆ ಈ ಹೃದಯದಲಿ
ಸಿರಿತನವೆಲ್ಲಿದೆ ಗೆಳತಿ ನೀ ಜೊತೆಯಾಗದೆ ಈ ಬದುಕಲಿ
ಸೀಯಾಗದು ಗೆಳತಿ ನೀ ಮೂಡದೆ ತಂಪಿರಳು ಕನಸಲಿ
ಸುಮ್ಮನಾವೆಲ್ಲಿದೆ ಗೆಳತಿ ನೀ ನುಡಿಯದೆ ಸಲ್ಲಾಪದೋಲೆ
ಸೂತ್ರವೆಲ್ಲಿದೆ ಗೆಳತಿ ನೀ ಸುಜನತೆ ಬೋಧಿಸದೆ ಈ ಬಾಳಿಗೆ
ಸೃಷ್ಟಿಯಾಗದಿಂದು ಗೆಳತಿ ಸೌಜನ್ಯದ ಸೌಖ್ಯದ ಬದುಕು
ಸೆರೆಮನೆಯಾಗಿದೆ ಗೆಳತಿ ನೀ ನಲಿಯದೆ ಈ ಚಿನ್ನದರಮನೆಯು
ಸೇರುವುದೆ ಗೆಳತಿ ಬಾಳನಾವೆಯು ಆ ಮೋಹದ ತೀರಕೆ?
ಸೈಸುವುದೆ ಗೆಳತಿ ಈ ಬಾಳು ನಿನ್ನ ಅಭಯದ ವಚನವಿಲ್ಲದೆ
ಸೊಗಸಾದ ಬೆಳುದಿಂಗಳು ಹಾದಿಯು ರಮಿಸದು ತನುವಿಗೆ
ಸೋಜಿಗದ ಸೌಂದರ್ಯದ ಜಗದ ಒಡಲಲಿ ಚೆಲುವೆಲ್ಲಿದೆ
ಸೌಭಾಗ್ಯದ ನಿನ್ನ ಅಂತಃಕರಣದ ಕೃಪೆಯಿರದೆ ಉಳಿವೆಲ್ಲಿದೆ
ಸಂಗಮವಾಗದೆ ಮನಸುಗಳು ಅಂತರಂಗದ ಆಸೆಗೆ ಗೆಲುವೆಲ್ಲಿದೆ
ಸಹಿತ ನಿನ್ನ ಸಾಂಗತ್ಯದಲೊಮೆ ಚೈತನ್ಯಧಾರೆಯಾಗಲಿ ಬಾಳಿಗೆ
ಸತ್ಕಾರದ ನಿನ್ನ ಅಕ್ಕರೆಯ ಕಡಲು ವರವಾಗಲಿ ಜೀವಕೆ
ಸಾಕಾರವಾಗಲಿ ನಮ್ಮ ಸಂಪ್ರೀತಿಯು ಜಗದ ಕೊನೆವರೆಗೂ
ಸಿದ್ಧಿಸುವ ಸತ್ಕಾರ್ಯಗಳಲಿ ಪರಾಕ್ರಮತೋರಲಿ ನಮ್ಮೊಲವು
ಸೀಳುದಾರಿಯೆಂದು ಎದುರಾಗದು ಗೆಳತಿ ಸಾಧನೆಯ ಹಾದಿಗೆ
ಸುಮದಂತೆ ನಿತ್ಯ ನಗುವುದು ಗೆಳತಿ ನಮ್ಮೊಲವ ಗದ್ದುಗೆ
ಸೂಸುತಾ ಬಾ ನಿನ್ನ ಸಿಹಿನಗುವ ಸೋನೆ ಈ ಬಾಳಿಗೆ
ರಾಮಚಂದ್ರ ಸಾಗರ್
