ಬೀಸುವ ತಂಪಲೆಯ ನಾದದಲಿ
ಒಲವ ಗಾನ ಹಾಡೋಣ ಬಾ
ಅರಳಿದ ಮಲ್ಲಿಗೆಯ ನಗುವಲಿ
ಪ್ರೇಮದ ಕುರುಹು ಕಾಣೋಣ ಬಾ
ಮುಸ್ಸಂಜೆಯ ರಂಗಿನ ಓರಣದಲಿ
ಒಲವ ರಂಗೋಲಿ ಎಳೆಯೋಣ
ಮಳೆ ಮೋಡದ ಹನಿಗಳ ಸದ್ದಿನಲಿ
ಪ್ರೇಮದ ಪದಗಳ ಗುನುಗೋಣ ಬಾ
ಸುಳಿಗಾಳಿಯ ಸೌಗಂಧದ ಸವಿಯಲಿ
ಒಲವ ಸೌರಭದ ಸೌಧ ಕಟ್ಟೋಣ
ನಲಿವ ನವಿಲಿನ ಸೋಜಿಗದ ಚೆಲುವಲಿ
ಹೃದಯ ನಲಿವಿನ ನಂದನವಾಗಿಸೋಣ ಬಾ
ಮೆಲು ನಗುತ ಮೋಹದ ಬಂಧದಲಿ
ಇನಿದಾದ ಕನಸುಗಳಿಗೆ ಸ್ವಾಗತಿಸೋಣ
ಮಮತೆಯ ಆಸರೆಯ ನೆರಳಲಿ
ಪ್ರೀತಿಯ ಪಾವಿತ್ರ್ಯ ಆರಾಧಿಸೋಣ ಬಾ
ಮಿಡಿದ ಹೃದಯಗಳ ಉಸಿರಿನಲಿ
ಸದಾ ಒಲವೇ ಉಸಿರಾಗಿಸೋಣ
ಹವಣಿಸು ಸವಿ ಕಣ್ಣೋಟದಲಿ
ಸತ್ಕಾರದ ಪ್ರೀತಿಯ ಬಯಸೋಣ ಬಾ
ರಾಮಚಂದ್ರ ಸಾಗರ್
ಬೆಡಗಿ..
ನಿನ್ನ ಬಾಹು ಬಂಧನವೆ
ನನ್ನ ಬಾಳಿನ ರಕ್ಷೆಯು
ನಿನ್ನ ಕಣ್ಣಿನ ಕಾಂತಿಯೆ
ನನ್ನ ಬಾಳಿನ ಬೆಳಕು
ನೀ ತೋರುವ ಜಗವೆ
ನನ್ನ ಬದುಕಿಗೆ ಮುನ್ನುಡಿಯು
ನೀ ಕರೆದ ದಾರಿಯೆ
ನೋವಿರದ ಬಾಳ್ವೆಯು
ನೀ ನಲಿವ ಜಗವೆ
ಒಲವರಂಗಿನ ಅಂಗಳವು
ನೀ ಕೈಹಿಡಿದ ಕ್ಷಣವೆ
ಸುಯೋಗದ ಅಭಿಷೇಕವು
ನಿನ್ನ ಮುದ್ದು ಮೊಗವೆ
ಮನದ ನೋವಿಗೆ ಪರಿಹಾರವು
ನಿನ್ನ ತುಂಟ ನಗುವೆ
ಸಿಹಿಯಾಮೃತದ ಒಡಲು
ನಿನ್ನ ಸವಿ ಮಾತಿನ ನುಡಿಯೆ
ಬಾಳಿಗೆಲ್ಲ ಸಡಗರದ ಶರಧಿಯು
ನಿನ್ನ ಸತ್ಕಾರದ ನಡೆಯೆ
ಬಾಳ ನೌಕೆಗೆ ಬೆಂಗಾವಲು
ರಾಮಚಂದ್ರ ಸಾಗರ್
ನೀ ಕಾಣದೆ ಜಗದಲಿ
ಈ ಹೃದಯಕೆ ಹಿತವೆಲ್ಲಿ
ನೀ ಬಾರದೆ ಜೊತೆಯಲ್ಲಿ
ಈ ಬಾಳಿಗೆ ನಗುವೆಲ್ಲಿ
ನಾ ಕಾಣುವ ಕನಸಲ್ಲಿ
ನೀನಿರದೆ ಸ್ವರ್ಗದಲಿ ಸುಖವೆಲ್ಲಿ
ನಾ ಸಾಗುವ ಇರುಳು ಹಾದಿಯಲಿ
ನೀನಿರದೆ ಶಶಿಹಾಸಕೆ ಸೊಬಗೆಲ್ಲಿ
ನನ್ನ ಎದೆಯ ಗೂಡಲ್ಲಿ
ನಿತ್ಯ ನಿನದೆ ಜಪವಿಲ್ಲಿ
ಪ್ರತಿ ಘಳಿಗೆ ಮನದಲ್ಲಿ
ಬಿಡುವಿರದ ನಿನ್ನ ನೆನಪುಗಳಿಲ್ಲಿ
ನಿನ್ನ ಪ್ರೀತಿಯ ಉಸಿರಿನಲಿ
ನನ್ನ ಜೀವಕೆ ಉಳಿಗಾಲವೆಲ್ಲಿ
ನಿನ್ನೊಲವ ಬಂಧನದಲಿ
ನಾ ನಲಿಯುತಿರುವೆ ಸಿಹಿ ಮೆಲುಕಲಿ
ಕಾತರವು ಎದೆಯ ಗೂಡಲಿ
ನಿನ್ನೊಲುಮೆಯ ಮೋಹದಲಿ
ಹಠವು ಹಗಲು ಇರುಳಲಿ
ನೀ ಜೀವದ ಉಸಿರಾಗುವ ನಂಬಿಕೆಯಲಿ
ಗೆಳತಿ..
ನೀ ಬರುವೆಯೆಂದು
ಒಲವಿನಾ ರಕ್ಷೆಯ ಭಿಕ್ಷೆಯನು
ಬಾಳಿಗೆ ನೀಡುವೆಯೆಂದು ?
ರಾಮಚಂದ್ರ ಸಾಗರ್
ಗೆಳತಿ..
ಬೆಡಗು ತುಂಬಿದ ಚೆಲುವ ಜಗದಲಿ
ಸದಾ ನಗುವು ನಿನ್ನದಾಗಿರಲಿ
ಸೊಗಸು ಅರಳಿದ ಹಸಿರು ಬನದಲಿ
ಒಲವ ತಂಗಾಳಿ ನಿನ್ನ ರಮಿಸಲಿ
ಸರೋವರದಲಿ ಅರಳಿದ ಹೂವು
ನಿನ್ನಂದಕೆ ಸೋತು ತಲೆಬಾಗಲಿ
ಹಸಿರೆಲೆಯಲಿ ಹೊಳೆವ ರಂಗು
ನಿನ್ನ ಮೊಗವ ನೇವರಿಸಲಿ
ಅಕ್ಕರೆಯ ನಿನ್ನ ಹೃದಯವು
ನೂರು ವರುಷ ಚಿರವಾಗಲಿ
ಸದಾ ನಿನ್ನ ಮೋಹದ ಕಡಲಲಿ
ನನ್ನ ಬಾಳು ಹರುಷದ ನೌಕೆಯಲಿ
ಬಂಧವಿರದ ಪ್ರೀತಿ ಜಗದಲಿ
ನಿನ್ನೊಲುಮೆಯ ನದಿಯು ಮೈದುಂಬಲಿ
ಕಾವಲಿಡುವ ನನ್ನ ಕಣ್ಣಲಿ
ನಿನ್ನ ಮೊಗವು ಸದಾ ನಗುತಿರಲಿ
ಅನುರಾಗದ ಸವಿ ಸ್ವರದಲಿ
ನಿನ್ನ ಸವಿ ನಾಮವೆ ಮೊಳಗಲಿ
ಪ್ರೇಮಿಸು ಎನ್ನುವ ನಿನ್ನೆದೆಯ ಸದ್ದಲಿ
ನನ್ನ ನಾಮವೇ ದನಿಸುತಿರಲಿ
ರಾಮಚಂದ್ರ ಸಾಗರ್
