ನವ್ಯತೆಯ ಹಾದಿಯಲ್ಲಿ ಕೈ ಹಿಡಿದು ನಿಂತಾಗ
ರವಿಕಾಂತಿಯ ಆಶಯದ ಕಿರಣವು
ಬಾಳಿಗೆ ಅಭಯದ ಹರುಷವಾಯಿತು
ಬಾಳಲಿ ಬೆಳಗುವ ಭರವಸೆ ನೀಡಿತು
ಬೆಸೆದ ಹೃದಯಗಳ ಒಲುಮೆಯ ದನಿಯಲಿ
ಮುದ್ದು ಮಾತುಗಳ ಅಬ್ಬರದಲಿ
ಅನುರಾಗದ ಗೀತೆಯ ಸ್ವರಮೇಳದಲಿ
ಬಾಳಲಿ ಸುಶ್ರಾವ್ಯ ಗೀತೆಯರಳಿತು
ಮುಂಜಾವಿನ ಸೊಬಗಲ್ಲಿ ಅರಳಿದ ಹೂಗಳತ್ತಾ
ಪ್ರೀತಿಸುವ ಮನಗಳ ನವಿರು ನೋಟದಲ್ಲಿ
ಒಲವಾಂಕುರವು ಬೆಸೆದ ಸಡಗರದಲಿ
ಬಾಳಲಿ ಸಂಭ್ರಮದ ಹೂವರಳಿತು
ಮಲ್ಲಿಗೆಯ ಮುದ್ದಿಸುತ ರವಿ ಕಿರಣ ನಗುವಾಗ
ವಯ್ಯಾರಿ ನಿನ್ನ ಸವಿ ಸಾಂಗತ್ಯದಲಿ
ಪ್ರೇಮದ ಪಲ್ಲಕ್ಕಿಯಲಿ ಬಂಧಿಯಾಗಿರಲು
ಬಾಳಲಿ ಪ್ರೇಮಸಜೆಯು ನಮ್ಮದಾಯಿತು
ರವಿಕಾಂತಿಯ ಸೊಬಗಲಿ ವಸುಂಧರೆಯ ಸನ್ನಿಧಿಯಲಿ
ಕಣ್ತುಂಬ ಸೌಂದರ್ಯವೆ ಪಳಿಸುತಿರಲು
ಜಗದ ಗೂಡು ನಳನಳಿಸುವ ಚೆಲುವೆಯಾಯಿತು
ಸಂತಸದಲಿ ಚೆಲುವ ಬದುಕರಳಿತು
ರಾಮಚಂದ್ರ ಸಾಗರ್
ಅಕ್ಕರೆಯಿಂದ ನೀ ಕೈಹಿಡಿದು ಸಾಗುತಾ
ಸಕ್ಕರೆಯಂತ ಮಾತುಗಳನು ಗುನುಗುತಾ
ಮನ ಮೋಹಿಸಿ ನೀ ಸಾಗುತಿರಲು
ನವ್ಯ ಕನಸುಗಳ ಅಕ್ಷಯವಾಗುತಿರಲು
ಪ್ರೇಮ ಸಾಗರವಾಯಿತು ನನ್ನೆದೆಯು
ನಿನ್ನ ಮೋಹದ ಮೊಗದ ಶಶಿಹಾಸದಲೆಯ
ನಗುಸುಧೆಯ ಅಕ್ಷಯಧಾರೆಯಲಿ
ಪ್ರೇಮಭವನಕೆ ನಿನ್ನ ಆಹ್ವಾನವಿರಲು
ಪ್ರೇಮಭವನವು ಸಾಕ್ಷಾತ್ಕಾರವಾಯಿತು
ನಮ್ಮೊಲವಿಗೆ ಆಸರೆಯಾಯಿತು
ಸೌಂದರ್ಯ ಸದನದತ್ತ ಸಾಗುತಾ
ಹೃದಯ ನಿವೇದನೆಗೆ ನೀ ಸಮ್ಮತಿಸಿ
ಪ್ರೇಮದ ಶುಭವಾಣಿ ನೀ ಝೇಂಕರಿಸುತಿರಲು
ಬಾಳಲಿ ನವೋಲ್ಲಾಸವು ಅಕ್ಷಯವಾಯಿತು
ಉಲ್ಲಾಸವು ಬದುಕಾಯಿತು
ನಿನ್ನ ವಯ್ಯಾರದ ನಡಿಗೆಯ
ಸೋಜಿಗದ ಸಿರಿಯ ಬೆಂಬತ್ತಿ ನಡೆವಾಗ
ಸೌಂದರ್ಯಧಾರೆ ಅಕ್ಷಯವಾಗುತಿರಲು
ಚೆಲುವ ಪಥವು ಕಂಗೊಳಿಸುತಿರಲು
ಬಾಳಲಿ ಸೊಬಗಿನ ರಂಗೇರಿತು
ರಾಮಚಂದ್ರ ಸಾಗರ್
ಗೆಳತಿ..
ಪರಿಹಾಸ ಸಾಗರದ ಉಬ್ಬರವೇ
ನೀ ಜೊತೆ ನಗುವ ಕ್ಷಣವು
ಪರಿಹಾಸ ಸಾಗರದ ತಂಪಲೆಯೇ
ನೀ ಅಪ್ಪಿದ ಘಳಿಗೆಯು
ಪರಿಹಾಸ ಸಾಗರದ ತಂಗಾಳಿಯೇ
ನೀ ಕೈಬೀಸಿದ ಘಳಿಗೆಯು
ಪರಿಹಾಸ ಸಾಗರದ ನಿನದವೇ
ನೀ ಗುನುಗುವ ಗಾನವು
ಪರಿಹಾಸ ಸಾಗರದ ಸೌಂದರ್ಯವೇ
ನಿನ್ನ ಮೋಹದ ಮೊಗವು
ಪರಿಹಾಸ ಸಾಗರದ ಸೌಜನ್ಯವೇ
ನಿನ್ನ ಪ್ರೀತಿಯ ಮಡಿಲು
ಪರಿಹಾಸ ಸಾಗರದ ನಮನವೇ
ನಿನ್ನ ಪಾವಿತ್ರ್ಯ ಬಂಧವು
ಪರಿಹಾಸ ಸಾಗರದ ಭರವಸೆಯೇ
ನಿನ್ನ ಅಭಯದ ನುಡಿಯು
ಪರಿಹಾಸ ಸಾಗರದ ಕಾಣಿಕೆಯೇ
ನಿನ್ನ ಒಲುಮೆಯ ರಥವು
ಪರಿಹಾಸ ಸಾಗರದ ಕಾತರವೇ
ನಿನ್ನ ನೆನಪುಗಳ ಜಾತ್ರೆಯು
ಪರಿಹಾಸ ಸಾಗರದ ನೌಕೆಯೇ
ನಿನ್ನೊಲುಮೆಯ ಬದುಕು
ಪರಿಹಾಸ ಸಾಗರದ ಕುರುಹೇ
ನಿನ್ನ ಮೋಹದ ಉಸಿರು
ರಾಮಚಂದ್ರ ಸಾಗರ್
ಮದುವೆಯೆಂದರೆ ಬದುಕೊಳಗೆ
ಪ್ರೀತಿ ದೀಪ ಬೆಳಗುವ ಸಂಭ್ರಮವು
ಮದುವೆಯೆಂದರೆ ಜೀವದೊಳಗೆ
ಎದೆಯದನಿಗೊಲಿದ ಜೀವಾತ್ಮವು
ಮದುವೆಯೆಂದರೆ ಜೀವದುಸಿರಿನಲಿ
ಬೆಸೆದ ಜೀವಗಳ ಉಲ್ಲಾಸವು
ಮದುವೆಯೆಂದರೆ ಗಾನದೊಳಗೆ
ಮೊಳಗುವ ಪದಗಳ ಅನುಬಂಧವೂ
ಮದುವೆಯೆಂದರೆ ಮನುಕುಲದುಳುವಿಗೆ
ಒಲುಮೆಯಾ ದಿವ್ಯ ಚೇತನವು
ಮದುವೆಯೆಂದರೆ ಜಗದೊಳಗೆ
ಮಮತೆ ಪ್ರೇಮದ ಹಂದರವು
ಮದುವೆಯೆಂದರೆ ಒಲವ ಜಲಧಿಯಲಿ
ಪಳಿಸುವ ಬೆಳುದಿಂಗಳ ಸೊಬಗು
ಮದುವೆಯೆಂದರೆ ಬಾಳ ಪಥದಲಿ
ಒಲವ ಸಾನಿಧ್ಯ ಸಿದ್ಧಿಸುವ ಘಳಿಗೆಯು
ಮದುವೆಯೆಂದರೆ ಪ್ರೇಮಸೌಧದೊಳಗೆ
ಒಲವಾಮೃತ ಸವಿಯುವ ಸಡಗರವು
ಮದುವೆಯೆಂದರೆ ಒಲವನೌಕೆಯೊಳಗೆ
ಸಾರಥಿಯಾಗುವ ಮನದಾಸೆಯು
ಮದುವೆಯೆಂದರೆ ಒಲವ ಮಂದಿರದೊಳಗೆ
ನಿತ್ಯ ಪೂಜಿಸುವ ಪೂಜ್ಯ ಬಂಧವೂ
ಮದುವೆಯೆಂದರೆ ಕುಟೀರದೊಳಗೆ
ಬೆಸೆದ ಮನಗಳ ಸಿಂಗಾರ ಬಂಧವೂ
ಮದುವೆಯೆಂದರೆ ಬಾಳೊಳಗೆ
ತ್ಯಾಗ ಮಮತೆಯ ಬಂಧವು
ಕಹಿ ಕರಗಿಸಿ ಸಿಹಿ ಸಿಂಚಿಸುವೆಡೆ
ಸಾಗುವ ಒಲುಮೆಯ ಹಠವು
ರಾಮಚಂದ್ರ ಸಾಗರ್
