ಭರವಸೆ

ನವ್ಯತೆಯ ಹಾದಿಯಲ್ಲಿ ಕೈ ಹಿಡಿದು ನಿಂತಾಗ
ರವಿಕಾಂತಿಯ ಆಶಯದ ಕಿರಣವು
ಬಾಳಿಗೆ ಅಭಯದ ಹರುಷವಾಯಿತು
ಬಾಳಲಿ ಬೆಳಗುವ ಭರವಸೆ ನೀಡಿತು

ಬೆಸೆದ ಹೃದಯಗಳ ಒಲುಮೆಯ ದನಿಯಲಿ
ಮುದ್ದು ಮಾತುಗಳ ಅಬ್ಬರದಲಿ
ಅನುರಾಗದ ಗೀತೆಯ ಸ್ವರಮೇಳದಲಿ
ಬಾಳಲಿ ಸುಶ್ರಾವ್ಯ ಗೀತೆಯರಳಿತು

ಮುಂಜಾವಿನ ಸೊಬಗಲ್ಲಿ ಅರಳಿದ ಹೂಗಳತ್ತಾ
ಪ್ರೀತಿಸುವ ಮನಗಳ ನವಿರು ನೋಟದಲ್ಲಿ
ಒಲವಾಂಕುರವು ಬೆಸೆದ ಸಡಗರದಲಿ
ಬಾಳಲಿ ಸಂಭ್ರಮದ ಹೂವರಳಿತು

ಮಲ್ಲಿಗೆಯ ಮುದ್ದಿಸುತ ರವಿ ಕಿರಣ ನಗುವಾಗ
ವಯ್ಯಾರಿ ನಿನ್ನ ಸವಿ ಸಾಂಗತ್ಯದಲಿ
ಪ್ರೇಮದ ಪಲ್ಲಕ್ಕಿಯಲಿ ಬಂಧಿಯಾಗಿರಲು
ಬಾಳಲಿ ಪ್ರೇಮಸಜೆಯು ನಮ್ಮದಾಯಿತು

ರವಿಕಾಂತಿಯ ಸೊಬಗಲಿ ವಸುಂಧರೆಯ ಸನ್ನಿಧಿಯಲಿ
ಕಣ್ತುಂಬ ಸೌಂದರ್ಯವೆ ಪಳಿಸುತಿರಲು
ಜಗದ ಗೂಡು ನಳನಳಿಸುವ ಚೆಲುವೆಯಾಯಿತು
ಸಂತಸದಲಿ ಚೆಲುವ ಬದುಕರಳಿತು  

ರಾಮಚಂದ್ರ ಸಾಗರ್