ಮುಂಜಾನೆಯ ವೇಳೆಯಲಿ ಅರಳಿದ ಮಲ್ಲಿಗೆಯು ನೀನಲ್ಲವೇ
ಪ್ರೇಮದ ಹೂಬನದಲಿ ಪ್ರೀತಿಯ ಕಂಪು ಚೆಲ್ಲಿದವಳು ನೀನಲ್ಲವೇ
ಸಾಗುವ ಹಾದಿಯಲಿ ಸಂಭ್ರಮದ ತೇರಾದವಳು ಗೆಳತಿ ನೀನಲ್ಲವೇ
ನಗು ತುಂಬಿದ ವದನದಲಿ ಉಲ್ಲಾಸದ ಅಲೆಯಾದವಳು ನೀನಲ್ಲವೇ
ಹೊಂಗನಸು ಎದೆಯಲಿ ಬಿತ್ತಿದ ಪೋರಿಯು ನೀನಲ್ಲವೇ
ಅನುರಾಗದ ಅಲೆಯಲಿ ಹೃದಯ ನಲಿಸಿದವಳು ನೀನಲ್ಲವೇ
ಸಿಂಗಾರದ ಜಗದಲಿ ಚೆಲುವಿನ ಬಳ್ಳಿಯಾದವಳು ನೀನಲ್ಲವೇ
ಕನಸಿನ ಲೋಕದಲಿ ಮೋಹಿಸಿ ಮುದ್ದಿಸಿದವಳು ನೀನಲ್ಲವೇ
ಉಲ್ಲಾಸದ ಉಯ್ಯಾಲೆಯಲಿ ಜೊತೆಯಾದವಳು ನೀನಲ್ಲವೇ
ಉನ್ಮಾದದ ಪ್ರೀತಿಯಲಿ ಹಗಲಿರುಳು ಕಾಡುವವಳು ನೀನಲ್ಲವೇ
ಸೌಮ್ಯದ ನಗುವಿನಲಿ ಸಡಗರದ ಜಾತ್ರೆಯನು ಕರುಣಿಸಿದವಳು ನೀನಲ್ಲವೇ
ಸೌಜನ್ಯದ ಹೆಜ್ಜೆಯಲಿ ಹೂಪಥದಲಿ ಕೈಹಿಡಿದವಳು ನೀನಲ್ಲವೇ..?
ರಾಮಚಂದ್ರ ಸಾಗರ್
