ಗೆಳತಿ..
ಮಲ್ಲಿಗೆಯ ಮಧುರ ಕಂಪಿನ ಘಮಲಿನ ಅಲೆಯಲಿ
ಪ್ರೀತಿಯ ಆಹ್ವಾನ ನೀಡಿದ ಕೋಮಲೆಯು ನೀನಲ್ಲವೆ
ಸೌರಭದ ಸವಿ ಜೇನಿನ ಮಂಟಪದಲಿ
ಮನಕೆ ಒಲವಿನ ಗಂಧಿಕೆ ಸವರಿದವಳು ನೀನಲ್ಲವೆ
ಪ್ರೇಮಾಮೃತದ ಹೂವಿನ ಮಳೆಯಲಿ
ಸೌಮ್ಯದ ನದಿಯಾಗಿ ಹರಿದವಳು ನೀನಲ್ಲವೆ
ಮೋಹದ ಅನುಪಮ ನಗುವಿನಲೆಯಲಿ
ಮನದ ದುಗುಡ ಕರಗಿಸಿದ ಕಾವ್ಯವು ನೀನಲ್ಲವೆ
ಸುಖದ ಕುಂಭವನು ಹೊತ್ತು
ದಾರಿಗೆ ಜೊತೆಯಾದವಳು ನೀನಲ್ಲವೆ
ಸುವರ್ಣದ ಸಂಭ್ರಮದ ಬದುಕನು
ಕೃಪೆಯಾಗಿಸಿದ ಕಾದಲೆಯು ನೀನಲ್ಲವೆ
ಅನುರಾಗದ ಆರಾಧ್ಯದಾ ಸ್ವರವನು
ಬಾಳಗೀತೆಯಾಗಿಸಿದ ಕೋಗಿಲೆಯು ನೀನಲ್ಲವೆ
ಕಾವಳದ ದುಗುಡದ ಕಂದರವನು
ಬೆಳಕಾಗಿಸಿದ ಕಿರಣವು ನೀನಲ್ಲವೆ
ಕಾಸಾರದ ತಿಳಿ ನೀರಿನಲಿ
ನಗುವ ಶಶಿಗೆ ಸೊಗಸಿನ ಸಿರಿಯು ನೀನಲ್ಲವೆ
ಸರೋವರದ ತಂಪಲೆಯ ಸುಖದಲಿ
ಅಕ್ಕರೆಯ ಸ್ವಾದವನು ಲೇಪಿಸಿದವಳು ನೀನಲ್ಲವೆ
ರಾಮಚಂದ್ರ ಸಾಗರ್
