ಸಡಗರವು ಅನುದಿನವು ಈ ಬಾಳಲಿ
ನಿನ್ನ ಸಿಂಗಾರದ ಮೋಹದ ಮೊಗವೆ
ಸೌಖ್ಯದ ಚಿಲುಮೆಯು ಈ ಜೀವದಲಿ
ನಿನ್ನ ಮುಡಿಯ ಮಲ್ಲಿಗೆಯ ಸೌಗಂಧವೆ
ಘಮ ಘಮಿಸುವ ಪ್ರೇಮವು ಈ ಜಗದಲಿ
ನಿನ್ನ ಸಿಂದೂರದ ರಂಗಿನ ಹೊಳಪೆ
ಘನಿಸುವ ಒಲವಿನ ಬಣ್ಣವು ಈ ಮನದಲಿ
ನಿನ್ನ ಮುಂಗುರುಳ ಸೌಮ್ಯದ ಲಾಲಿತ್ಯವೆ
ಪ್ರೇಮದ ಹೂಬನಕೆ ನೀಡಿದ ಆಮಂತ್ರಣವು
ನಿನ್ನ ತುಟಿಯಂಚಿನ ಮೆಲು ನುಡಿಯೆ
ಪ್ರೇರಣೆಯ ಬಾಳಿನ ಸಾಕ್ಷಾತ್ಕಾರದ ಆಲಾಪವು
ನಿನ್ನ ಹಸಿರುಡುಗೆಯ ಸೊಬಗಿನ ಚೆಲುವೆ
ಸೌಂದರ್ಯ ಜಗದ ಅನುಪಮ ಬೆಡಗು
ನಿನ್ನ ಕೈಬಳೆಗಳ ಇಂಪಾದ ದನಿಯೆ
ಅನುರಾಗದ ಸ್ವರಮೇಳದ ಕೀರ್ತನೆಯು
ನಿನ್ನ ಕೋಮಲ ನಡಿಗೆಯ ಸಾರಥ್ಯವೆ
ವೈಭವದ ಹಾದಿಯ ಸಂತಸದ ಸಿಂಚನವು
ನಿನ್ನ ಕಿರುನೋಟದ ಸಜ್ಜನಿಕೆಯ ಆಹ್ವಾನವೆ
ನನ್ನೆದೆಯಲಿ ಪ್ರೇಮಶರಧಿಯ ಉಬ್ಬರಕೆ ಕಾರಣವು
ರಾಮಚಂದ್ರ ಸಾಗರ್
