ಬಾಳ ಗೆಳತಿಯಾಗು ಬಾ

ಎದೆಯ ದನಿಯು ತೀರುವ ಮೊದಲು
ಜೀವದೊಲುಮೆಯ ಉಸಿರಾಗು ಬಾ ಗೆಳತಿ
ಒಲವ ಪದಗಳು ಕಮರುವ ಮೊದಲು
ಅಭಯದಾ ಮಾತುಗಳೆರಡು ನೀ ನೀಡು ಬಾ ಗೆಳತಿ

ಕಣ್ಣ ನೋಟವು ಕ್ಷಯವಾಗುವ ಮುನ್ನ
ಒಲುಮೆಯ ಮಂದಿರದಲಿ ದೇವತೆಯಾಗು ಬಾ
ಕಾತರಿಸುವ ಕನಸು ಬೂಧಿಯಾಗುವ ಮುನ್ನ
ಒಲವ ಹಂದರದಲಿ ಆಸರೆಯಾಗಲು ಬಾ

ಕಾಂತಾರದ ದುರ್ಗಮದಲಿ ದಾರಿಯಾಗು ಬಾ
ಕಾಂತಿಹೀನ ಜಗದಲಿ ಬೆಳಕಾಗು ಬಾ
ಒಲವ ಕಾರ್ಪಣ್ಯ ಕರಗಿಸುವ ಚೈತನ್ಯವಾಗು ಬಾ
ಕಾವಳದ ಮನಕೆ ದೀಪವಾಗು ಬಾ

ಪ್ರೇಮದ ನಾವೆ ಸುಳಿಗೆ ತುತ್ತಾಗುವ ಮುನ್ನ
ಪ್ರೀತಿಯ ದಯೆ ಬಾಳಿಗೆ ಕರುಣಿಸಲು ಬಾ
ಪ್ರೀತಿಯ ತೇರಿಗೆ ಸಾರಥಿಯಾಗಲು ಬಾ
ಒಲವನೌಕೆಗೆ ಇಂಧನವಾಗು ಬಾ

ಬವಣೆಯಲಿ ಬದುಕು ಬತ್ತುವ ಮುನ್ನ
ಮಮತೆಯಲಿ ಬದುಕು ಅರಳಿಸು ಬಾ
ಸಾರುವೆ ತುಂಬಿದ ಹಾದಿ ದಿಗಿಲೇಳಿಸುವ ಘಳಿಗೆಯಲಿ
ನೋವಿನ ಶರಧಿಯ ಕರಗಿಸುವ ಬಾಳ ಗೆಳತಿಯಾಗು ಬಾ

 ರಾಮಚಂದ್ರ ಸಾಗರ್