ಬಾಳಲಿ ಸದ್ದಿಲ್ಲದೇ ಹರಿವ ಪ್ರೀತಿಯ ಹೊನಲಾದೆ
ಒಲವ ನಾವೆಗೆ ಉಲ್ಲಾಸದ ಹರಿಗೋಲು ನೀನಾದೆ
ಮಮತೆಯ ಸೆಲೆಯ ಜಲಧಿಯು ನೀನಾದೆ
ಬತ್ತದಾ ಸರೋವರದಲಿ ನಗುವ ಕಮಲವಾದೆ
ಸದಾ ಗುನುಗುವ ಗಾನದ ಸ್ವರವಾದೆ
ಸತ್ಕಾರದ ನಗುವಿನ ಕರುಣಾಳು ನೀನಾದೆ
ಒಲವ ಸದನದಲಿ ಸದಾ ಬೆಳಗುವ ದೀಪವಾದೆ
ಸಂಪನ್ನ ಜಗದಲಿ ನಡೆಸುವವಳು ನೀನಾದೆ
ಪ್ರೇಮ ಸಮಾಗಮದಲಿ ನವ್ಯತೆಯ ಕಣಜವಾದೆ
ಪ್ರೀತಿ ಸಂಕೀರ್ತನೆಯಲಿ ಒಲವಗಾಥೆಯಾದೆ
ಸುಯೋಗದ ಬಾಳಲಿ ಚೈತನ್ಯಧಾರೆಯು ನೀನಾದೆ
ಸುಗಂಧದ ಮಮತೆಯಲಿ ಅರಳಿದ ಕುಸುಮವಾದೆ
ಸೊಗಸು ತುಂಬಿದ ಒಲವ ಬನದ ಕುಸುಮವಾದೆ
ಒಲುಮೆಯ ಕಂಪು ಪಸರಿಸುವ ಸೌಗಂಧವಾದೆ
ನಗುವ ಚಂದಿರನ ಕಾಡುವ ಚೆಲುವ ತನೆಯು ನೀನಾದೆ
ಒಲವ ಹೂ ಮೊಗ್ಗು ಅರಳಿಸುವ ಕಿರಣವಾದೆ
ಅವಿರತ ಕಾಡುವ ಕನಸಿಗೆ ಉತ್ತರವು ನೀನಾದೆ
ಆನಂದದ ಆಭರಣವು ಬಾಳಿಗೆ ನೀ ತಂದೆ
ಆಭಾರದ ಗುಣಗಳ ಬಾಳಿಗೆ ತಂದವಳು ನೀನಾದೆ
ಆರಾಧಿಸುವ ಪ್ರೀತಿಗೆ ಮಂದಿರವು ನೀನಾದೆ
ರಾಮಚಂದ್ರ ಸಾಗರ್
