ನಾ ನೆನಪಾದರೆ..

ಗೆಳೆಯಾ..

ನಾ ನೆನಪಾದರೆ ನಿನಗೆ ಮರೆಯದಿರು

ನೀ ನೀಡಲು ತುಸು ನಗುವೊಂದನು...

ನೀ ಬಯಸಿದರೆ ಬಾಳಿಗೆ ಜೊತೆಯಾಗಲು

ಈ ಗುಲಾಬಿಯನು ನೀ ಸ್ವೀಕರಿಸು...

ನಾ ಪ್ರಿಯವಾದರೆ ನಿನಗೆ ಕರೆದುಬಿಡು

ನಿನ್ನ ನೆನಪಲೆ ನಾ ಮರೆಯಾಗುವ ಮುನ್ನ....

ನಿನ್ನುಡಿಯು ನನ್ನ ಕರೆವ ತನಕ

ನಾ ಕಿವಿಯಗಲಿಸಿಡುವೆ ನಿತ್ಯ...

ನೀ ನೋಡಿದ ಘಳಿಗೆ ಅರಳಿದ ಒಲವು

ಕಿಚ್ಚಾಗಿದೆ ಅಚ್ಚಾಗಿದೆ ಎದೆಯೊಳಗೆ...

ನಿನ್ನುಸಿರು ನನ್ನ ತಾಕುವ ತನಕ

ನಾ ಮಾಡುವೆನು ನಿತ್ಯ ಜಪವ..

ನೀ ಒಪ್ಪುವುದಾದರೆ ಬೇಗನೆ ಒಪ್ಪಿಬಿಡು

ನಾ ವಿಧಿಯ ಅಪ್ಪುವ ಮುನ್ನ...

ನಾ ಹಿತವಾದರೆ ನಿನ್ನ ಹೃದಯಕೆ

ನೀ ಕಾಡಿಸದೆ ಅರೆನಿಮಿಷ ಎದುರಾಗಿಬಿಡು..

ನಿನ್ನೊಲವ ರಕ್ಷೆಯ ಮಹಲಿನೊಳಗೆ

ಈ ಮುಗುದೆಯ ಮನ ರಮಿಸಿಬಿಡು..

ನಾ ಪ್ರಿಯೆಯೆನಿಸಿದರೆ ನಿನ್ನ ಉಸಿರಿನೊಳಗೆ

ನೀ ಬಾಡಿಸದಿರು ಈ ಗುಲಾಬಿಯನು 

ಕಡಲ ತಡಿಯ ತಂಗಾಳಿಯೊಳಗೆ

ಈ ಹುಡುಗಿಯ ಮನ ಸುಡದಿರು..

ನಾ ನೆನಪಾದರೆ ಗೆಳೆಯಾ ನೀ ಮರೆಯದಿರು

ಗುಲಾಬಿ ಹಿಡಿದ ಕೈಗಳ ಮೊರೆಯನು...

ರಾಮಚಂದ್ರ ಸಾಗರ್

ನಮ್ಮದಾಗಲಿ ಗೆಳತಿ..

ಕೋಮಲ ನಿನ್ನ ನಗುವಿನ ಸಿಹಿಯಿಂದ

ಸವಿಯಾದ ಬದುಕು ನಮ್ಮದಾಗಲಿ ಒಲವೆ

ನಿರ್ಮಲ ನಿನ್ನ ಮನದ ಸಹವಾಸದಿಂದ

ಸಿದ್ಧಿಸುವ ಹಾದಿಯು ನಮ್ಮದಾಗಲಿ ಚೆಲುವೆ

ಆದರದ ನಿನ್ನ ನಗುಧಾರೆಯ ಬಲದಿಂದ

ಸತ್ಕಾರದ ಮನೆಯು ನಮ್ಮದಾಗಲಿ ಕಾದಲೆ

ಔದಾರ್ಯದ ನಿನ್ನ ಅಕ್ಕರೆಯ ನುಡಿಯಿಂದ

ಸಡಗರದ ನಾವೆಯು ನಮ್ಮದಾಗಲಿ ನಲ್ಲೆ

ಸುವರ್ಣದ ನಿನ್ನ ನಗುವಿನ ಚೆಲುವಿನಿಂದ

ಕಂಗೊಳಿಸುವ ಹೂ ಬನವು ನಮ್ಮದಾಗಲಿ

ಸುಲಲಿತ ನಿನ್ನ ಇಂಪಾದ ದನಿಯಿಂದ

ಅನುರಾಗದ ಸ್ವರಮೇಳುವು ಝೇಂಕರಿಸಲಿ

ರಮ್ಯತೆಯ ನಿನ್ನ ನಗುವಿನ ರತ್ನದಿಂದ

ರಂಜಿಸುವ ದಿನಗಳು ನಮ್ಮದಾಗಲಿ

ಪ್ರೀತಿಯ ನಿನ್ನ ರಕ್ಷೆಯ ಕೋಟೆಯಿಂದ

ಭಯವಿಲ್ಲದ ಬಂಧನವು ನಮ್ಮದಾಗಲಿ

ಬೆಳಗುವ ನಿನ್ನ ನಗುವಿನ ರಶ್ಮಿಯಿಂದ

ರಾರಾಜಿಸುವ ದೀವಿಗೆಯು ನಮ್ಮದಾಗಲಿ

ಸೌಮ್ಯದ ನಿನ್ನ ನಗುವಿನ ಸ್ನೇಹದಿಂದ

ನೋವಿರದ ಯಾತ್ರೆಯು ನಮ್ಮದಾಗಲಿ ಗೆಳತಿ..

ರಾಮಚಂದ್ರ ಸಾಗರ್

ನಗುವಿನ ಸಂಭ್ರಮವು

ನಿನ್ನ ಕುಡಿ ನೋಟದ ಸವಿ ನಗುವೇ

ವೈಭವದ ಈ ಬಾಳಿನ ಸಿರಿ ಸಂಭ್ರಮವು

ನಿನ್ನ ಸನ್ನಿಧಿಯ ಸಿಹಿ ಸಾಂಗತ್ಯವೇ

ಮಂಗಳವು ಈ ಬಾಳಲಿ ಅನುಕ್ಷಣವು 

ನಿನ್ನ ಕೋಮಲ ವದನ ಸೌಂದರ್ಯವೇ

ಹೊಂಗನಸುಗಳ ಚೆಲುವಿನ ಮೇಳವು

ನಿನ್ನ ಮುಂಗುರುಳ ಮೇರು ನರ್ತನವೇ

ಪ್ರೀತಿಯ ಮನದ ಹರುಷದ ಉಲ್ಲಾಸವು

ನಿನ್ನ ಸೌಮ್ಯದ ಮೆಲು ಮಾತುಗಳೆ

ಸಜ್ಜನಿಕೆಯ ಈ ಪ್ರೀತಿಗೆ ತೋರಣವು

ನಿನ್ನ ವಾತ್ಸಲ್ಯದ ಮಹದಾಸರೆಯೆ

ಅಕ್ಕರೆಯ ಅರಮನೆಯ ಬಂಧನವು

ನಿನ್ನ ಅಭಯದ ಆಹ್ಲಾದದ ವಚನವೇ

ಈ ಬಾಳಿಗೆ ಆನಂದದ ನೌಕೆಯು

ನಿನ್ನ ಅನುಪಮ ಪ್ರೇಮದ ಆಹ್ವಾನವೇ

ನಾ ಸಾಗುವ ಹಾದಿಯಲಿ ಗೆಲುವಿನ ಸೌಗಂಧವು

ನಿನ್ನ ಆದರದ ಪಾವನ ಹೃದಯವೇ

ಅಕ್ಷಯದ ಒಲವಿನ ಕಾಣಿಕೆಯು ಶ್ರೀರಕ್ಷೆಯು

ನಿನ್ನ ಸರಳತೆಯ ಸಂಸ್ಕಾರವೇ

ಸಂಪನ್ನತೆಯ ಶ್ರೀರಕ್ಷೆಯ ನದಿಯೆಂದಿಗು..

ನಿನ್ನ ಮೆಲು ನೋಟದ ಸೋಜಿಗವೇ

ಮನದಲಿ ಸಿಹಿ ಚೆಲ್ಲುವ ಸಡಗರವು

ನಿನ್ನ ಮೋಹಕ ಮೋಡಿಯ ನಗುವೇ

ಮೋಹಿಸುವ ಈ ಹೃದಯಕೆ ಸಂಭ್ರಮವು 

ರಚನೆ: ರಾಮಚಂದ್ರ ಸಾಗರ್

ಚಿತ್ರ: ಸಂಭ್ರಮ ಶ್ರೀ

ಪ್ರೇಮವೆಂದರೆ..

ಪಾವಿತ್ರ್ಯ ಮನದ ಸೌಂದರ್ಯದ ರೂಪವೆ ಪ್ರೇಮ

ಜೊತೆಯಾದ ಜೀವದ ರಕ್ಷೆಯ ಅಭಯವೆ ಪ್ರೇಮ

ದುಗುಡಕು ದಣಿವಾಗಿಸುವ ವಾತ್ಸಲ್ಯದ ನಗುವೆ ಪ್ರೇಮ

ನಿಸ್ವಾರ್ಥದ ನಿನದದ ಛಲದ ಪಾವನ ನಡೆಯೆ ಪ್ರೇಮ

ಶುಭದ ಹಾಡಿನ ನವಿರಾದ ಸ್ವರಮೇಳವೇ ಪ್ರೇಮ  

ಸೌಜನ್ಯದ ಮಹಲಿನ ವಿನಯದ ಕಳಸವೆ ಪ್ರೇಮ

ಹೃದಯದ ದನಿಗೆ ಇಂಪಾಗಿಸುವ ಅನುರಾಗವೆ ಪ್ರೇಮ

ಸೌಖ್ಯ ಸೌರಭದ ಸಾಗರದಲೆಯ ಹಿತವೆ ಪ್ರೇಮ

ಬಡತನದ ಕುಟೀರದಲು ಹರುಷವ ಸುರಿಸುವುದೆ ಪ್ರೇಮ

ಬಂಧುರ ಜಗದೊಳು ಕ್ಷೇಮವ ಹಾರೈಸುವುದೆ ಪ್ರೇಮ

ಹಾಳುಸುರಿವ ಹಾದಿಯಲಿ ಹೊಂಗನಸು ಹಾಸುವುದೆ ಪ್ರೇಮ

ಸಂಪನ್ನ ಮನಗಳ ಬೆಸುಗೆಯ ಶಕ್ತಿಯೆ ಪ್ರೇಮ

ಒಲವಿನ ತೇರಿನ ಚೈತನ್ಯದ ಯಾತ್ರೆಯ ಉಸಿರೆ 

ಒಲಿದ ಜೀವಗಳ ಒಮ್ಮತದ ವಚನವೆ ಪ್ರೇಮ

ಅಪಸ್ವರ ನುಸುಳದ ನಿರ್ಮಲ ಮನದ ಕೋಟೆಯೆ 

ಅಪಥ್ಯ ಅಪಮಾನ ದಹಿಸುವ ದಿವ್ಯತೆಯೆ ಪ್ರೇಮ

ಬಾಳಿನ ಕೊನೆವರೆಗು ಕೈಹಿಡಿವ ಮಮತೆಯ ವಾಗ್ದಾನವೆ

ಭಾವನೆಗಳ ಮೆರವಣಿಗೆಯೊಳು ಆದರದ ಸಾನ್ನಿಧ್ಯವೆ 

ನಂಬಿಕೆ ಗೌರವ ಅಭಿಮಾನ ಸ್ನೇಹಗಳ ಸಂಗಮವೆ

ಪ್ರೀತಿಯ ಅಕ್ಷಯದ ಕಡಲಿನ ಸಾರ್ವಭೌಮವೆ ಪ್ರೇಮ

ರಾಮಚಂದ್ರ ಸಾಗರ್