ನೋಡು ಬಾ ಗೆಳತಿ..

ಪ್ರೇಮದ ಹೂವು ಅರಳುತಿದೆ 

ನೋಡಲ್ಲಿ ಒಲುಮೆಯಾ ಗೆಳತಿ

ಪ್ರೀತಿಯ ಹೊಂಗಿರಣ ಮೂಡುತಿದೆ 

ನೋಡಲ್ಲಿ ನನ್ನೊಲವಿನ ರಾಣಿ..

ಮಂಜಿನ ಹನಿಗಳ ಸೊಬಗಿನಲಿ

ನಮ್ಮೀ ಬಿಂಬವು ಹೊಳೆಯುತಿದೆ

ತಿಳಿ ಸರೋವರದ ನೀರಿನಲಿ

ನಮ್ಮೀ ನಗುಮೊಗವು ಕಾಣುತಿದೆ..

ಹೂತೋಟದ ಬಣ್ಣದ ಚಿತ್ತಾರದಲಿ

ನಮ್ಮೀ ಮನವು ನಲಿಯುತಿದೆ

ಸೌಂದರ್ಯದ ಬೃಂದಾವನದಲಿ

ನೆಲೆಯಾಗಲು ಬಾಳೆಲ್ಲಾ ಬೇಡುತಿದೆ..

ನಗುವ ಮಲ್ಲಿಗೆಯ ಸಿಂಗಾರದಲಿ

ಮನ ರಮಿಸುವ ವರವಿದೆ ಗೆಳತಿ

ಘಮಿಸುವ ಮಲ್ಲಿಗೆಯ ಸೌರಭದಲಿ

ನಮ್ಮೊಲವು ಕಂಪಿಸುವ ಸುಳಿಯಿದೆ..

ಹರಿವ ತೊರೆಯ ಹರುಷದಲಿ

ಕಾಡುವುದು ನಮ್ಮೊಲವ ಚೈತನ್ಯತಾನೆ..

ಸುಳಿದಾಡುವ ಸಿಹಿಗಾಳಿಯಲಿ

ಗುನುಗುವುದು ನಮ್ಮೊಲವ ಗೀತೆತಾನೆ..

ನೋಡಲ್ಲಿ ಓ ಗೆಳತಿ ಈ ಮುಂಜಾನೆಯಲಿ

ನಮ್ಮೊಲವ ಪ್ರೇಮದ ಹೂವು ಅರಳುತಿದೆ...

ರಾಮಚಂದ್ರ ಸಾಗರ್