ನೀ ಸಂಭ್ರಮವಾದಂತೆ..

ಚೆಲುವೆಯೆ ನೀ ನಡೆದರೆ

ಹೂಲತೆಯೇ ನಲಿದಂತೆ

ಕೋಮಲೆಯೆ ನೀ ನಗುತಿರೆ

ಸುಮವೇ ನಾಚುತ ನಕ್ಕಂತೆ

ಗೆಳತಿಯೆ ನೀ ಜೊತೆಯಾದರೆ

ಸುಖವು ಅಲೆಯಾದಂತೆ

ಮಾಧುರಿಯೆ ನೀ ಬಳಿಯಾದರೆ

ಸಿಹಿಕಡಲು ಉಬ್ಬರಿಸಿದಂತೆ

ಸೌರಭಿಯೆ ನೀ ಕಂಪಿಸಿದರೆ

ಪ್ರೀತಿಯ ಕಂಪು ಜಗವಾದಂತೆ

ಅನುರಾಗವೆ ನೀ ಗುನುಗಿದರೆ

ಪ್ರೇಮದ ಪಲ್ಲವಿ ಹಾಡಿದಂತೆ

ನಗುವಿನಲಿ ನೀ ನುಡಿದರೆ

ಹರುಷದ ಮಳೆಯೆ ಸುರಿದಂತೆ

ವಿನಯದಿ ನೀ ಕರೆದರೆ

ಸೌಜನ್ಯವೆ ಒಲಿದಂತೆ

ಕಾದಲೆ ನೀ ಕೈಹಿಡಿದರೆ

ಬಾಳು ವೈಭವದ ತೇರಾದಂತೆ

ನಲ್ಲೆ ನೀ ಸಾರಥಿಯಾದರೆ

ಬಾಳು ಗೆಲುವಿನ ಸಂಭ್ರಮವಾದಂತೆ..

ರಚನೆ: ರಾಮಚಂದ್ರ ಸಾಗರ್

ಚಿತ್ರ: ಸಂಭ್ರಮ ಶ್ರೀ