ಮೋಹದ ಮಳೆಯಾದೆ

ಒಲವಸುಧೆಯಂತೆ ಉಸಿರಾದೆ ನೀ ಹೃದಯಕೆ 
ಮೋಹದ ಕಡಲಲೆಯಂತೆ ನೀ ತಣಿಸಿದೆ  ಬಾಳಿಗೆ
ಬಿರಿದ ಹೂವಂತೆ ನೀ ಕಂಪಿಸಿದೆ ಬಾಳಲಿ
ಒಲವ ಕಿರಣದಂತೆ ನೀ ಬೆಳಗಿದೆ ಮನದಲಿ

ಬಯಕೆಯ ಮನೆಯೊಳಗೆ ಮೋಹದ ಮಳೆಯಾದೆ
ನವ್ಯತೆ ಹಾದಿಯೊಳಗೆ ಭವ್ಯತೆಯ ಕನಸಾದೆ
ಹೂಬನದ ಸೊಬಗಿನಂತೆ ಚೆಲುವಿನ ಜಗವಾದೆ
ಶುಭದ ಹಾಡಿನೊಳಗೆ ಮಮತೆಯ ದನಿಯಾದೆ

ನಗುವ ಕಲೆಯೊಳಗೆ ಮರೆಯಾಗಿಸಿದೆ ಕಹಿಪಾಶ
ಸಲ್ಲಾಪದ ಸವಿಯೊಳಗೆ ಮೂಡಿಸಿದೆ ನವೋಲ್ಲಾಸ
ಸೌಜನ್ಯದ ಸಿರಿಯೊಳಗೆ ನಾವಿಕಳಾದೆ ನಾವೆಗೆ
ಸಂಪ್ರೀತಿಯ ಒಡಲೊಳಗೆ ಆಸರೆಯಾದೆ ಜೀವಕೆ

ಸೌಖ್ಯದ ಹಾದಿಯೊಳಗೆ ನಗುವ ಹೂವಾದೆ
ಅಕ್ಕರೆಯ ನೌಕೆಯೊಳಗೆ ಒಲವ ಸಾರಥಿಯಾದೆ
ಶುಭ್ರತೆಯ ಮನದೊಳಗೆ ಒಲವು ಶುಭವಾಗಿಸಿದೆ
ರಮಿಸುವ ನಯನದೊಳಗೆ ಅಭಯದ ರಕ್ಷೆಯಾದೆ

ಬೆಳುದಿಂಗಳು ರಾತ್ರಿಯಲಿ ಶಶಿಗೆ ಅಲೆದಾಡಿಸಿದೆ
ಸೌಂದರ್ಯ ಸಮರದಲಿ ನೈದಿಲೆಗೆ ನಾಚಿಸಿದೆ
ತಂಪಿರುಳು ಹವೆಯಲಿ ಮೈಮನಕೆ ಬಿಸಿಯಾಗಿಸಿದೆ
ಸವಿಜೇನಿನ ಮಳೆಯಲಿ ನೀ ಉದಿತ ಮಧುವಾದೆ

ರಾಮಚಂದ್ರ ಸಾಗರ್