ನೀ ಮಹನೀಯಳಾದೆ

ಗೆಳತಿ..
ಮಧು ಮಧುರ ಧಾರೆಯ ನಿನ್ನ ಸವಿನೋಟದ ಕುಡಿಯಲಿ
ಮಾಧುರ್ಯದ ಮೋಹದ ನಿನ್ನ ಸವಿನಯ ಕೈಸೆರೆಯಲಿ
ಮಿಂಚುವ ಕಣ್ಣೋಟದ ನಿನ್ನ ಕಾಂತಿಯ ಹೊಳಪಲಿ
ಮೀಟುವ ಸಹೃದಯದ ನಿನ್ನ ಭಾವನೆಯ ತೋಟದಲಿ
ನಾ ಬಂಧಿಯಾದೆನು ನಿನ್ನೊಲವಿನಲೆಯಲಿ ತೇಲಿದೆನು

ಮುಗ್ಧ ಮಾತಿನ ನಿನ್ನ ಮಮತೆಯ ನುಡಿಯಲಿ
ಮೂಡುತಿದೆ ಅಭಯವು ನಿನ್ನಾಸರೆಯ ಗುಡಿಯಲಿ
ಮೃದು ಹೆಜ್ಜೆಯ ನಿನ್ನೊಲುಮೆಯ ಹಾದಿಯಲಿ
ಮೆರುಗು ತುಂಬಿದ ನಿನ್ನ ಮೆಲುನಗುವ ಸೊಬಗಲಿ
ನಲಿದಾಡಿದೆ ಮನಸು ನಳನಳಿಸಿದೆ ಬದುಕು

ಮೇರು ಚೆಲುವಿನ ನಿನ್ನ ಅಕ್ಕರೆಯ ಬಂಧದಲಿ
ಮೈದೋರಿದ ಮನನದ ನಿನ್ನ ಸಿರಿಸಾರದ ಘಮಲಿನಲಿ
ಮೊನೆಯಿಲ್ಲದ ಬಾನಂತ ನಿನ್ನ ಸವಿಸ್ತಾರ ಪ್ರೀತಿಯಲಿ
ಮೋಹನಮಾಲೆಯಂತ ನಿನ್ನ ಸತ್ಕಾರದ ಹೊದಿಕೆಯಲಿ
ನೀ ಸಿರಿಯಾಗಿಸಿದೆ ಬಾಳು ನೀ ಬೆಳಗಿದೆ ಬಾಳು

ಮೌಲಿಕ ಪ್ರೇಮದ ನಿನ್ನೊಲವ ನದಿಯಲಿ
ಮಮ್ಮಲ ಮರುಗಿದ ಮನದಾಸೆಗಳ ಚೈತನ್ಯಧಾರೆಯಲಿ
ಮಹನೀಯ ಬಾಳ್ವೆಯ ಕನಸಿನ ಕಣಜದಲಿ
ಮನ್ನಿಸುವ ಗುಣಗಳ ಸಂಕಲನದ ವೈಭವದಲಿ
ನೀ ಚೇತನವಾದೆ ನೀ ಮಹನೀಯಳಾದೆ

ರಾಮಚಂದ್ರ ಸಾಗರ್

ಚತುರೆಯು ನೀನಲ್ಲವೇ

ತಣಿರು ತಂಗಾಳಿಯಲಿ ತಣಿಸಿದ ತಂಪಲೆಯು 
ತಾರುಣ್ಯದ ನೌಕೆಯಲಿ ರಮಿಸಿದ ತರುಣಿಯು 
ತಿಳಿ ಕಾಸಾರದಲಿ ನಗುವ ಕುಸುಮವು
ತೀರದಾ ದಾಹದುರಿಗೆ ಉತ್ತರವಾದವಳು ನೀನಲ್ಲವೇ

ತುಡಿತದ ಹೃದಯಕೆ ಬೆಸೆದ ಉಸಿರು  
ತೂಗುವ ಒಲವ ಮೇನೆಯಲಿ ಜೊತೆಯಾಗಿ ನಕ್ಕವಳು
ತೃಪ್ತ ಒಲುಮೆಯ ದೀಪವಾಗಿ ಬೆಳಗುವವಳು
ತೆರೆದಮನದ ಪಾವನೆಯು ನೀನಲ್ಲವೇ ಗೆಳತಿ

ತೇಜಸ್ಸು ಒಲವ ಮಂದಿರದಲಿ ಹರಿಸಿದವಳು
ತೈಲಚಿತ್ರದಲಿ ಪಳಿಸುವ ಚೆಲುವತನಯೆ ನೀನಲ್ಲವೇ
ತೊಟ್ಟಿಕ್ಕುವ ಪ್ರೀತಿ ಹನಿಯನು ಕಡಲಾಗಿಸಿದವಳು
ತೋರುವ ಜಗದಲಿ ಒಲವ ರಂಗು ಚೆಲ್ಲಿದವಳು ನೀನಲ್ಲವೇ

ತಂಬಿಸುವ ಮುಸ್ಸಂಜೆಯಲಿ ಕೈಹಿಡಿದ ಕಾದಲೆಯು
ತಹತಹಿಸುವ ಮನದಲಿ ನಿರಾಳತೆ ತುಂಬಿದವಳು
ತಳಿರುಗೆಂಪು ಕಿನಾರೆಯಲಿ ಹೊಂಗನಸು ಪೋಣಿಸಿದವಳು
ತಾಕತ್ತು ಸಂಪ್ರೀತಿಯಲಿ ತುಂಬಿದ ಚತುರೆಯು ನೀನಲ್ಲವೇ

ತಿರುಳನು ಬಾಳಿಗೆ ಕರುಣಿಸಿದ ಕರುಣಾಳು 
ತೀರದ ಒಲವಿನ ಅಕ್ಷಯದ ಒಡಲಾದವಳು
ತೆನೆತುಂಬಿ ಅಕ್ಕರೆಯ ಕಾಳಿನ ಹೊಡೆ ಕಟ್ಟಿದವಳು
ತೇಜಸ್ವಿನಿಯಾಗಿ ಬಾಳು ಕಂಗೊಳಿಸಿದ ಕಾಂತೆ ನೀನಲ್ಲವೇ

ರಾಮಚಂದ್ರ ಸಾಗರ್

ಬರಬಾರದೇ ಗೆಳತಿ

ಅಮಿತ ಕಾಡುವ ಕನಸಿಗೆ ಉತ್ತರವಾಗಲು ಬರಬಾರದೇ
ಆನಂದದ ಆನನಕೆ ಮಾಲೆಯಾಗಲು ಬರಬಾರದೇ
ಇನಿದಾದ ಮೋಹದ ಮಳೆಯಾಗಲು ಬರಬಾರದೇ
ಈ ಹೃದಯದಾ ಕುಶಲತೆ ಕೇಳಲಿಂದು ಬರಬಾರದೇ

ಉಲ್ಲಾಸದ ಉತ್ಸವದಲಿ ಸಾಗಲು ಬರಬಾರದೇ
ಊಹಿಸುವ ಬಾಳಲಿ ಜೊತೆಯಾಗಲು ಬರಬಾರದೇ
ಋತದ ಪ್ರೀತಿಯಲಿ ಒಂದಾಗಲು ಬರಬಾರದೇ
ಎಳಸು ಮನದಲಿ ಬಲ ನೀಡಲು ಬರಬಾರದೇ

ಏಕಾಂತದದ ವೇಳೆಯಲಿ ಸಿಂಗಾರವಾಗಲು ಬರಬಾರದೇ
ಐಕ್ಯದಾ ಪ್ರೀತಿಯಲಿ ಬೆಳಕಾಗಲು ಬರಬಾರದೇ
ಒನಪು ನಗುವಿನಲಿ ಬಾಳ ತೇರಾಗಲು ಬರಬಾರದೇ
ಓಜಸ್ಸು ಮಮತೆಯಲಿ ಉದಿಸಲು ಬರಬಾರದೇ

ಔದಾರ್ಯದ ಸ್ನೇಹದಲಿ ಕೈಹಿಡಿಯಲು ಬರಬಾರದೇ
ಅಮೃತಪಾನ ಪ್ರೇಮದಲಿ ಉಣಿಸಲು ಬರಬಾರದೇ
ಅಹಮಿಕೆ ತ್ಯಾಗದಲಿ ತೋರೋಣ ನೀ ಬರಬಾರದೇ
ಅನಂತ ಸುಖದಲಿ ಬಾಳೋಣ ನೀ ಬರಬಾರದೇ

ಆಲಾಪದ ಸವಿಜೇನಲಿ ತಣಿಸಲು ನೀ ಬರಬಾರದೇ
ಇಂಪಾದ ಸವಿಗಾನದಲಿ ರಮಿಸಲು ನೀ ಬರಬಾರದೇ
ಈಷ್ರ್ಯೆಯ ಜಗದಲಿ ಜಯದಾತಳಾಗಲು ನೀ ಬರಬಾರದೇ
ಉನ್ಮೀಲಿತ ಮನದಲಿ ನೆಲೆಯೂರಲು ನೀ ಬರಬಾರದೇ

ನೋವಿನ ಶರಧಿಯಿಂದ ಮೇಲೆತ್ತಲು
ವಿರಹದ ವಿಷಕೆ ಕೊನೆ ಹೇಳಲು
ನೀ ಬರಬಾರದೇ ನೀ ಕೈಹಿಡಿಯಬಾರದೇ
ರಾಮಚಂದ್ರ ಸಾಗರ್

ಕಾಯುತಿರುವೆ ನಿನಗಾಗಿ

ಮೋಹದ ಶರಧಿಯ ಸಮ್ಮೋದದಲೆಯಾಗಿ ಬೀಸಿದವನೇ
ಮೋಹಿಸುವ ಬದುಕಿನ ಪ್ರೇರಣೆಯಾಗಿ ಬೆಳಗಿದವನೇ
ಸತ್ಕಾರದ ಸವಿಮಾತನು ಎದೆಯಲಿ ಉಸಿರಾಗಿಸಿದವನೇ
ಸಡಗರದ ನದಿಯ ಜೀವಜಲವಾಗಿ ಹರಿದವನೇ
ಕಾದಿರುವೆ ನಿನಗಾಗಿ ನಿನ್ನೊಲವ ಸುಜಲಧಾರೆಗಾಗಿ

ಹೃದಯ ಸೌಂದರ್ಯ ಮೈದೊಳೆದು ರಮಿಸಿದವನೇ
ಹೃದಯಂಗಮದ ನೀತಿಗೆ ಉತ್ತರವಾಗಿ ಸಿಕ್ಕವನೇ
ಹೃದಯ ಕಮಲದಲಿ ನೆಲೆಯಾದ ಚೆಲುವನೇ
ಹೃಸ್ವ ಸ್ವರದಲಿ ಒಲವಮೇಳ ಅಲೆಯಾಗಿಸಿದವನೇ
ರಚ್ಚೆ ಹಿಡಿದಿರುವೆ ನಿನಗಾಗಿ ನಿನ್ನೊಲವ ಸ್ವರಧಾರೆಗಾಗಿ

ಕೀಟಲೆಯ ಕನಸುಗಳಲಿ ಕಚಗುಳಿಯಿಟ್ಟವವೇ
ಕಿಶೋರದ ಒಲವಿನಲಿ ಬಲತನ ತಂದವನೇ
ಕಿನಾರೆಯ ಹೂಬನಲಿ ನೈದಿಲೆಯಾಗಿ ನಕ್ಕವನೇ
ಕಿಚ್ಚಿಸುವ ಮನದಲಿ ಸಮ್ಮೋಹದ ತಣಿವಾದವನೇ 
ಕಳವಳಿಸುತಿರುವೆ ನಿನಗಾಗಿ ನಿನ್ನೊಲವ ಕೈಸೆರೆಗಾಗಿ

ವಯ್ಯಾರದ ಸರೋವರದಲಿ ಪ್ರೇಮ ನೌಕೆಯಾದವನೇ
ವಸುಧಾತಳ ಶಿರದಲಿ ಸುಳಿದಾಡುವ ತಂಗಾಳಿಯಾದವನೇ
ವಸುಮತಿಯ ಎದೆಯ ಬೆಳಗುವ ರವಿಸುತನೇ
ವನಸುಮದ ಸೌರಭದ ಸೌಗಂಧವಾಗಿ ಅಪ್ಪಿದವನೇ
ಬಯಸುತಿರುವೆ ನಿನಗಾಗಿ ನಿನ್ನೊಲವ ಸೌರಭದಲೆಗಾಗಿ

ಇನನ ತೇರಿನಲಿ ನವ್ಯತೆಯ ಬೆಳಕಾಗಿ ಬಂದವನೇ
ಇನಿದಾದ ಕನಸಿನಲಿ ಶುಭವಾಣಿ ನುಡಿದವನೇ
ಇರಾದೆಯ ಪ್ರೀತಿಯನು ರುಜುವಾತು ಪಡಿಸಿದವನೇ
ಇಚ್ಛಿಸುವ ಬಾಳನು ಕಾಯುವ ಯೋಧನೇ
ಕಾಯುತಿರುವೆ ನಿನಗಾಗಿ ನಿನ್ನೊಲವ ರಕ್ಷೆಗಾಗಿ

ರಾಮಚಂದ್ರ ಸಾಗರ್